چینائی۔ 14 اگست (ایجنسیز) ٹاملناڈو کے ضلع وِلوپورم میں ایک خانگی اسکول کی کلاس روم میں گیارہویں جماعت کے طالب علم کی اچانک موت نے سنسنی پھیلا دی۔ تفصیلات کے مطابق 16 سالہ موہن راج، ترو ویکا اسٹریٹ کے ایک مشہور خانگی اسکول میں گیارہویں جماعت میں تعلیم تھا۔ آج صبح کلاس شروع ہونے سے کچھ دیر پہلے موہن راج اچانک بیہوش ہوکر گر پڑا۔ موہن راج کو ایک خانگی ہاسپٹل لے جایا گیا جہاں ڈاکٹروں نے بتایا کہ اس کے خون میں آکسیجن کی مقدار بہت کم ہے۔ مزید علاج کیلئے اسے دوسرے خانگی ہاسپٹل منتقل کیا گیا، لیکن وہاں ڈاکٹروں نے معائنے کے بعد تصدیق کی کہ وہ پہلے ہی دم توڑ چکا تھا۔ متوفی کی والدہ مہیشوری نے الزام لگایا کہ بیٹے کو کوئی بیماری نہیں تھی، وہ ایک ہونہار طالب علم تھا۔ انہوں نے کہا کہ اسکول کا بیاگ بہت بھاری تھا، اور آج وہ اسے اٹھا کر چار منزلہ سیڑھیاں چڑھ کر کلاس میں گیا، اسی دباؤ کی وجہ سے یہ واقعہ پیش آیا۔
مہیشوری کی شکایت کی بنیاد پر وِلوپورم ٹاؤن پولیس نے مقدمہ درج کر کے تحقیقات شروع کر دی ہیں۔ پولیس کا کہنا ہے کہ پوسٹ مارٹم رپورٹ آنے کے بعد ہی طالب علم کی موت کی اصل وجہ سامنے آ سکے گی۔متوفی کے گھر والوں نے کہا کہ رواں تعلیمی سال گیارہویں جماعت کے لیے عام امتحانات منسوخ کرنے کا اعلان کیا جا چکا ہے، اس کے باوجود گیارہویں کے طلبہ کے لیے خصوصی کلاسز جاری تھیں۔ ایسے میں انہی خصوصی کلاسز میں شریک ان کے بچے کی موت ہوگئی
