بحرینی بینک کی منفردپیشکش
دبئی:بحرین میں ایک بینک نے کورونا وائرس کی ویکسین لگوانے والے کسٹمرس کی حوصلہ افزائی کیلئے ایک منفرد پیشکش کا اعلان کیا ہے اور کہا ہے کہ ویکسین لگوانے والوں کو قرضے کی فیس میں معافی کے علاوہ بینک کاری کی مختلف سہولتیں مہیا کی جائیں گی۔ السلام بینک کی انتظامیہ کا کہنا ہے کہ کوویڈ۔19کی ویکسین لگوانے والے کسٹمرس کو کسی قسم کی فیس کے بغیر مختلف مالیاتی سہولتیں دی جائیں گی اوروہ ’’مزایا سوشل ہاؤسنگ پروگرام ‘‘ سمیت مختلف قرضوں کی سہولت سے استفادہ کرسکتے ہیں۔البتہ اس پیشکش سے استفادہ کرنے والوں کو محکمہ صحت کا جارہ کردہ سرکاری میڈیکل سرٹیفکیٹ یا بحرین کے ’’بی اوئیر‘‘ ایپ ’BeAware‘ ثبوت کے طور پر دکھانا ہوگا۔ السلام بینک کے ریٹیل بنکنگ کے سربراہ محمد بہیج کا کہنا ہے کہ ہمیں فخر ہے کہ ہم ’’السلام اقدام‘‘ شروع کررہے ہیں،اس کا مقصد بحرینی کمیونٹی کے اہل افراد کی کوویڈ۔19 کی ویکسین لگوانے کیلئے حوصلہ افزائی کرنا ہے تاکہ ان کا ایک فرد یا وسیع ترکمیونٹی کی حیثیت سے تحفظ کیا جاسکے۔واضح رہے کہ خلیج تعاون کونسل کے رکن ممالک میں کوویڈ۔19 کی ویکسین لگوانے والوں کی حوصلہ افزائی کیلئیمختلف مراعات کا اعلان کیا گیا ہے۔ ویکسین کے انجیکشن لگوانے والوں کو ڈرائیونگ ٹریننگ میں رعایت دی جارہی ہے،مفت میں کافی پیش کی جارہی ہے اور ٹیکسی کے مفت سفر کی سہولت دی جارہی ہے۔ لیکن بحرین میں کوویڈ۔19 کی ویکسین کی حوصلہ افزائی کیلئے کچھ زیادہ ہی سہولتیں دی جارہی ہیں۔