سوشل میڈیا پر نقص امن والے پوسٹ پر سخت انتباہ، ایس پی یوگیش گوتم کی میڈیا سے بات چیت
نارائن پیٹ؍ کوسگی۔ 23 جنوری ( سیاست ڈسٹرکٹ نیوز) ضلع ایس پی نارائن پیٹ مسٹر یوگیش گوتم آئی پی ایس نے انتباہ دیا کہ اگر سوشل میڈیا پر امن و امان کو خراب کرنے والی پوسٹ کی گئیں تو سخت کارروائی کی جائے گی۔ آج میڈیا سے بات کرتے ہوئے انہوں نے ایودھیا میں رام مندر کے افتتاحی پروگرام کے موقع پر نارائن پیٹ ضلع کے کوسگی منڈل مستقر میں منعقدہ شوبھایاترا میں دو برادریوں کے درمیان ہونے والے واقعہ میں 07 افراد کے خلاف مختلف دفعات کے تحت پہلے ہی مقدمات درج کیے گئے ہیں۔ . انہوں نے کہا کہ وہ کچھ دوسرے افراد سے بھی تفتیش کر رہے ہیں۔ انہوں نے خبردار کیا کہ ان کے پاس ان کی تفصیلات اور ویڈیوز موجود ہیں اور ان کے خلاف قانون کے مطابق کارروائی کی جائے گی۔ لوگ سوشل میڈیا پر آنے والی افواہوں پر یقین نہ کریں۔ انہوں نے بتایا کہ فسادات کو روکنے کے لیے سخت انتظامات کیے گئے ہیں۔ انہوں نے خبردار کیا کہ امن و سلامتی کو خراب کرنے کے لیے سوشل میڈیا پر پوسٹ کرنے والوں اور ایڈمنز کے خلاف کارروائی کی جائے گی۔ انہوں نے کہا کہ تمام مذاہب کے لوگ پرامن رہیں اور بھائی چارے کا جذبہ رکھیں اور ذات پات اور مذہب سے بالاتر ہو کر تہوار منائیں۔واضح رہے کہ کوسگی حلقہ کوڑنگل میں کل رام مندر کے افتتاح کے موقع پر شوبھا یاترا ریالی نکالی گئی۔ بھگوا اشرار نے مدینہ مسجد کوسگی کے سامنے اشتعال انگیز نعرے لگاتے ہوئے عشاء کی نماز کے بعد آتشبازی کرتے ہوئے مسجد کے اندر زعفرانی جھنڈے پھینکے گئے، پولیس خاموش تماشائی بنی رہی۔ اس کے بعد حالات خراب ہوتا دیکھ کر محلہ مومن پیٹ کے مسلمان اور کوسگی کے نوجوانوں نے جمع ہوکر احتجاج کیا اور اشرار کو گرفتار کرنے کی مانگ کی اور پولیس ڈاؤن ڈاون کے نعرے لگائے۔ حالات کو دیکھتے ہوئے ضلع نارائن پیٹ ڈی ایس پی کوسگی نے مدینہ مسجد کا معائنہ کیا اور مسلمانوں سے کہا کہ جو کوئی بھی مسجد میں جھنڈے وغیرہ پھینکے ہیں ان پر ہم مقدمہ درج کرکے تحقیقات کریں گے اور سخت کارروائی کی جائے گی۔ اس موقع پر محمد آصف شیخ تحسین، محمد صدیق، محمد مولانا صاحب اور محمد ظہیر باشاہ صدر تنظیم مساجد کمیٹی اور سید اسمعیل معتمد اور الحاج خواجہ معین الدین نائب صدر کثیر تعداد میں مسلمانوں نے شرکت کی۔