چوتھے مرحلہ کی رائے دہی کے دوران پر تشدد واقعات‘بوتھ کی پولنگ ملتوی‘ ممتا کا آج کوچ بہار کا دورہ
بنگال انتخابات
کولکاتا: مغربی بنگال کے کوچ بہار میں چوتھے مرحلہ کی رائے دہی کے موقع پر پولنگ بوتھ کے باہر فائرنگ میں5 افراد کی موت ہوگئی ہے۔ترنمول کانگریس اور بی جے پی دونوں دعویٰ کر رہی ہیں کہ مرنے والوں کا تعلق ان کی پارٹی سے ہے۔ ترنمول کانگریس نے دعویٰ کیا ہے کہ کوچ بہار ضلع کے سیتال کوچی اسمبلی حلقے میں مرکزی فورسیس کی فائرنگ میں اس کے5 ورکروں کی موت ہوگئی ہے۔ وزیرا علیٰ ممتا بنرجی کل کوچ بہار کا دورہ کریں گی اور صورت حال کا جائزہ لیں گی۔ ترنمول کانگریس نے الیکشن کمیشن سے شکایت کی ہے کہ اس معاملے میں مداخلت کریں اور لوگوں کے جان کی حفاظت کو یقینی بنائیں۔پولنگ بوتھ کے باہر ترنمول کانگریس اور بی جے پی ورکروں کے درمیان جھڑپ کے بعد مرکزی فورسیس نے فائرنگ کی ہے۔ پولیس نے بتایا کہ مرنے والے کی شناخت آنند برما کے طور پر ہوئی ہے۔ مرنے والے کی لاش پٹھان ٹولی علاقے کے بوتھ نمبر 85 کے باہر پڑی ہوئی تھی۔ دونوں پارٹیاں دعویٰ کر رہی ہے کہ برمن کا تعلق ا ن کی جماعت سے ہے تاہم اس علاقے میں بڑی تعداد میں پولیس فورس کو تعینات کر دیا گیا ہے۔اس کے بعد ہی بوتھ کے باہر ترنمول کانگریس اور بی جے پی حامیوں کے درمیان جھڑپ ہوئی۔ پہلے مرکزی فورسیس نے لاٹھی چارج کرکے مجمع کو منتشر کرنے کی کوشش کی۔ اس کے بعد فائرنگ کی گئی۔ الیکشن کمیشن نے اس پورے معاملے میں رپورٹ طلب کی ہے۔مرکزی فورسیس نے دعوی کیا ہے کہ اچانک 300 سے 400 افراد نے انہیں گھیرے میں لے لیا تھا۔ دونوں طرف سے جاری جھڑپ کو روکنے کے لئے مرکزی فورسیس کو خود دفاع میں فائرنگ کرنے پر مجبور ہونا پڑا۔ مرکزی فورسیس نے بتایا کہ ایک کی موقع پر ہی موت ہوگئی تھی جب کہ تین افراد کی موت اسپتال میں ہوئی ہے۔ذرائع کے مطابق جاں بحق ہونے والے افراد کی شناخت آنند برما، منیر الزمان ، حمید میاں، چمن الحق اور نور عالم میاں کے طور پر ہوئی ہے۔الیکشن کمیشن نے مبینہ طور پر مرکزی فورسیس کی فائرنگ میں پانچ افراد کی موت کے بعد اس بوتھ کی پولنگ ملتوی کرنے کا فیصلہ کیا ہے۔ کمیشن نے پولیس کی رپورٹ کی بنیاد پر بتایا کہ مرکزی فورسیس کا رائفل چھیننے کی کوشش کی گئی ہے۔ کوچ بہار کے سیٹل کوچی اسمبلی حلقہ میں پولنگ اسٹیشن نمبر 126 پر فائرنگ واقعہ کے بعد الیکشن کمیشن نے پولنگ ملتوی کرنے کا فیصلہ کیا ہے۔