نئی دہلی۔16 فروری (سیاست ڈاٹ کام ) ہندوستانی کرکٹ ٹیم کے کپتان ویراٹ کوہلی نے پلوامہ میں دہشت گردانہ حملہ کے بعد ایک بڑا فیصلہ کیا ہے۔ کوہلی نے ٹویٹر پر لکھا کہ ان کے فاونڈیشن کے ذریعہ دئے جانے والے انڈین اسپورٹس آنر ایورڈ کو رد کردیا گیا ہے۔ یہ پروگرام اب بعد میں کیا جائے گا۔ کوہلی نے ٹویٹر پر لکھا کہ غم کے اس وقت میں ہم اس پروگرام کو منسوخ کررہے ہیں ، جسے آج ( ہفتہ ) ہونا تھا۔ اس سے پہلے کوہلی نے لکھا کہ پلوامہ حملہ کی خبر سن کر دنگ ہوں ، شہید جوانوں کو میری طرف سے خراج عقیدت اور زخمی جوانوں کے جلد صحتیاب ہونے کی دعا کرتا ہوں۔ خیال رہے جمعرات کو پلوامہ میں دہشت گردانہ حملہ ہونے کے کچھ گھنٹوں کے بعد ہی کوہلی کو اپنے ایک ٹویٹ کی وجہ سے ٹرول ہونا پڑا تھا۔ دراصل کوہلی نے ٹویٹر پر ایک پروموشنل ٹویٹ کو ری ٹویٹ کیا ، جس کے بعد لوگ بھڑک گئے اور انہیں پیسہ کے اوپر حب الوطنی کو ترجیح دینے کی نصیحت کر ڈالی ۔پلوامہ دہشت گرد حملے کی ہر گوشے سے نہ صرف مذمت کی جارہی ہے بلکہ کئی زاویوں سے اس تخریب کاری میں ملوث افراد کیخلاف سخت سے سخت کارروائی کرنے کا مطالبہ بھی زور پکڑرہا ہے
