کئی افراد ہنوز لاپتہ ‘متاثرین کی مدد کیلئے امیت شاہ کا تیقن
تھرواننتاپورم: کیرالا کے کئی اضلاع میں بارش نے تباہی مچا رکھی ہے اور کئی علاقوں میں سیلابی صورتحال ہے۔ دریں اثنا کوٹائم ضلع کے کوٹیکل میں لینڈ سلائیڈنگ نے تباہی مچائی ہے، جس کے بعد بڑے پیمانے پر راحت و امدادی کام جاری ہیں۔ آج 5 نعشیں برآمد ہوئی ہیں۔ اس کے ساتھ ہی بارش کے باعث مٹی کے تودے گرنے سے مرنے والوں کی تعداد 18 ہوگئی ہے۔ کچھ لوگ ابھی تک لاپتہ ہیں جن کی تلاش کی جا رہی ہے۔جنوبی اور وسطی کیرالا میں شدید بارش ہو رہی ہے، جس کے سبب تری ویندرم، کولم، پدنماٹیٹا، کوٹائم اور اڈوکی میں ندی اور نہریں بارش کی وجہ سے اپنی سطح سے اوپر بہہ رہی ہیں۔ ایسے میں عوام کی مشکلات میں مزید اضافہ ہو گیا ہے۔ صورتحال اتنی خراب ہے کہ ریاست کے بارش سے متاثرہ علاقوں میں امدادی کارروائی کے لیے فوج اور این ڈی آر ایف کی ٹیمیں تعینات کی گئی ہیں۔ کیرالا میں بارش سے راحت کے کوئی آثار نظر نہیں آرہے ہیں اور شدید بارش کا سلسلہ جاری ہے۔ کئی علاقوں میں ریڈ اور آرنج الرٹ جاری کیا گیا ہے۔ محکمہ موسمیات کے مطابق ریاست کے 5 اضلاع میں شدید بارش کے پیش نظر ریڈ الرٹ جاری کیا گیا ہے۔ مرکزی وزیرداخلہ امیت شاہ نے متاثرین کی ہر ممکن مدد کا تیقن دیا ہے۔ محکمہ موسمیات کے مطابق کوٹائم، اڈوکی، تریشور، پدن مٹیکا اور ایرناکولم میں ریڈ الرٹ جاری کیا گیا ہے۔ یہ ریڈ الرٹ اگلے 2 دن کے لیے جاری کیا گیا ہے۔
بارش کے حوالے سے ریاست کے کچھ علاقوں میں اورنج الرٹ بھی جاری کیا گیا ہے۔ ملپورم، تریویندرم، کولم، الپولا، پالکڑ، کولیکوڈ اور وایاناد میں اورنج الرٹ جاری ہے۔