اوٹاوا۔ کینیڈا کے محکمہ شماریات کی جاری کردہ مردم شماری کے نئے اعداد و شمار کے مطابق پنجابی زبان کینیڈا میں سب سے زیادہ بولی جانے والی دوسری زبان بن گئی ہے جب کہ اردو پانچویں زبان ہے ۔ ڈان میں شائع ایک رپورٹ کے مطابق 18 اگست کو جاری ہونے والی 2021 کی مردم شماری سے پتہ چلا ہے کہ 4کروڑ 6 لاکھ کینیڈین بنیادی طور پر گھر میں انگریزی یا فرانسیسی زبانوں کے علاوہ کوئی دوسری زبان بولتے ہیں، ان میں سے اردو کینیڈا میں بولی جانے والی 12 زبانوں کی درجہ بندی میں پانچویں سرفہرست زبان بن گئی ہے ۔ کینیڈا میں مینڈیرن اور پنجابی بولنے والوں کی تعداد میں نمایاں اضافہ ہوا ہے جس میں سنہ 2016 میں تقریباً 6لاکھ 10ہزار افراد مینڈیرن بولتے تھے لیکن اب یہ تعداد 2021 میں بڑھ کر 7لاکھ 30ہزار تک پہنچ گئی ہے جبکہ پنجابی بولنے والوں کی تعداد 5لاکھ 43ہزار سے بڑھ کر 7لاکھ 63ہزار تک پہنچ گئی ہے ، مردم شماری میں شمار کیے گئے پنجابی دراصل ہندوستان سے آئے ہیں جو گورمکھی پنجابی زبان بولتے ہیں۔ دیگر جنوبی ایشیائی زبانیں بولنے والوں کی تعداد میں بھی نمایاں اضافہ دیکھا گیا، ان میں ہندی بولنے والے (1لاکھ 33ہزار سے بڑھ کر 2لاکھ 24ہزار)، ٹیگالوگ بولنے والے (5لاکھ10ہزار سے بڑھ کر 5لاکھ 90ہزار) اور اردو (2لاکھ 43ہزار سے بڑھ کر 2لاکھ 97ہزار) ہو گئے ہیں۔
