اوٹاوا : کینیڈا کے حکام اور سیاستدانوں نے ہندوستانی ہندوؤں کے خلاف کینیڈا چھوڑنے کے بیان کی مذمت کی ہے۔ کینیڈا کے وزیر ڈومینک لی بلینک کا کہنا ہے کہ ہندو کینیڈینوں کے خلاف نفرت انگیز بیان ہماری اقدار کے خلاف ہے۔ جارحیت، نفرت، ڈرانے دھمکانے یا خوف پھیلانے کی کینیڈا میں کوئی جگہ نہیں۔ واضح رہے کہ سکھ فار جسٹس گروپ کے رہنما گروپتون سنگھ پنن نے ہندوستانی ہندوؤں کو کینیڈا چھوڑنے کا کہا تھا۔ علاوہ ازیں کینیڈا کے وزیرِ اعظم جسٹن ٹروڈو نے ایک مرتبہ پھر ہندوستان پر کینیڈین شہری ہردیپ سنگھ نجر کے قتل کا الزام عائد کیا ہے لیکن انہوں نے ہندوستان کے ملوث ہونے سے متعلق شواہد عام کرنے سے انکار کر دیا ہے۔ دوسری جانب کینیڈین حکام کا کہنا ہے کہ ہندوستان کے ہردیپ سنگھ نجر کے قتل میں ملوث ہونے کے الزامات کینیڈا میں ہندوستانی سفارتکاروں کی نگرانی اور ایک اہم اتحادی ملک کی جانب سے فراہم کردہ انٹیلی جنس معلومات پر مبنی ہیں۔
