سورت:گجرات کے ضلع سورت میں کل رات ایک بے قابو گاڑی نے سڑک کنارے سونے والے 20 افراد کو کچل دیا جس میں سے 15 کی موت ہو گئی۔ پولیس نے آج بتایا کہ یہاں سے تقریباً 50کلومیٹر دور کِم-مانڈوی روڈ پر کوسنبا کے پلوڈگام کے نزدیک یہ حادثہ ہوا۔ ہلاک ہونے والے بنیادی طور پر راجستھان کے ضلع بانسواڑہ کے کُشل گڑھ کے مزدور بتائے گئے ہیں۔ مہلوکین میں بچے اور خواتین بھی شامل ہیں۔ درمیانی رات کے آس پاس ایک تیز رفتار ڈمپر، گنا لدے ایک ٹریکٹر- ٹرالی سے تصادم کے بعد بے قابو ہو کر ان مزدوروں کے اوپر چڑھ گئی۔ ان میں سے 12 کی برسر موقع موت ہو گئی۔ 8 زخمیوں میں سے 3 نے سورت کے اسمیمیر اسپتال میں دم توڑ دیا۔ پولیس نے ڈمپر کو ضبط کرکے اس کے ڈرائیور اور کلینر کو گرفتار کرلیا ہے ۔ بتایا جاتا ہے کہ ڈرائیور نے شراب پی رکھی تھی۔ معاملے کی تفصیلی چھان بین کی جا رہی ہے ۔ اس درمیان وزیراعظم نریندر مودی نے اس حادثے پرگہرے دکھ کا اظہار کیا اور مہلوکین کے ورثاء کو دو‘ دو لاکھ اور زخمیوں کے لیے 50 ہزار روپئے کی امداد کا اعلان کیا ہے ۔
