پٹنہ، 6 ستمبر (یو این آئی) گنگا ندی کی سطح آب میں مسلسل اضافے اور اس کے نتیجے میں پیدا ہونے والی سیلاب کی صورتحال کے پیش نظر پٹنہ ضلع انتظامیہ نے ندی کے کنارے ، پشتوں اور نشیبی علاقوں میں رہنے والے لوگوں سے مکمل چوکسی اور احتیاط برتنے کی اپیل کی ہے ۔ضلع انتظامیہ کی جانب سے اتوار کو جاری ضروری ہدایات میں لوگوں سے ندی، گھاٹ، پشتوں اور نشیبی علاقوں میں غیر ضروری طور پر نہ جانے کو کہا گیا ہے ۔ انتظامیہ نے بچوں، بزرگوں اور معذور افراد کو ندی اور پانی بھرے علاقوں سے دور رکھنے کی اپیل کی ہے ۔ضلع مجسٹریٹ کے دفتر نے لوگوں سے محفوظ مقامات اور امدادی کیمپوں کی معلومات پہلے سے رکھنے اور ضرورت پڑنے پر فوری طور پر وہاں جانے کو کہا ہے ۔ اس کے ساتھ ہی ندی میں نہانے ، تیرنے ، کشتی کے ذریعے غیر ضروری آمدورفت اور سیلفی لینے جیسی خطرناک سرگرمیوں سے مکمل طور پر گریز کرنے کا مشورہ دیا گیا ہے ۔ضلع انتظامیہ نے سیلاب کے خدشے کے پیش نظر لوگوں سے ضروری دستاویزات، دوائیں، موبائل فون، ٹارچ، پینے کا پانی اور دیگر ضروری سامان محفوظ اور آسانی سے لے جانے کے قابل رکھنے کو کہا ہے ۔ضلع انتظامیہ نے لوگوں سے افواہوں سے بچنے اور صرف ضلع انتظامیہ کی جانب سے جاری سرکاری معلومات پر بھروسہ کرنے کی اپیل کی ہے ۔ پانی کی سطح بڑھنے یا سیلاب کی صورتحال پیدا ہونے پر انتظامیہ اور امدادی ٹیموں کی ہدایات پر فوری عمل کرنے کو کہا گیا ہے ۔
