جموں۔21 مئی ۔ (یواین آئی) جموں و کشمیر کے لیفٹیننٹ گورنر منوج سنہا کا کہنا ہے کہ جموں و کشمیر میں حالیہ پاکستانی گولہ باری کے دوران جاں بحق ہونے والوں کے اہلخانہ میں سے ایک فرد کو سرکاری نوکری دی جائے گی۔انہوں نے کہا کہ متاثرہ خاندانوں کو مناسب معاوضہ دیا جائے گا۔لیفٹیننٹ گورنر نے ان باتوں کا اظہار چہارشنبہ کو راجوری میں نامہ نگاروں کے سوالوں کا جواب دینے کے دوران کیا۔انہوں نے کہا کہ میں نے اپنی آنکھوں سے گولہ باری سے ہوئی تباہی دیکھی، یہاں کے لوگوں سے ملا اور انتظامیہ کے افسروں کے ساتھ میٹنگ کی۔اُن کا کہنا تھا کہ متاثرین کو امداد بہم پہنچائی گئی اور زخمیوں جن کی حالت بہتر ہے ، کو مفت علاج کرایا گیا۔منوج سنہا نے کہا کہ آج یہ بڑا فیصلہ لیا گیا کہ جموں وکشمیر میں حالیہ گولہ باری سے جتنے شہید ہوئے ہیں جنہوں نے جانیں گنوائی ہیں، ان کے اہلخانہ میں سے ایک فرد کو سرکاری نوکری دی جائے گی۔انہوں نے کہا کہ کئی گھروں کو نقصان ہوا ہے ، اس کا جائزہ لیا جارہا ہے ان کی باز آباد کاری کیلئے بھارت سرکار سے ایک پیکیج منظور کر وایا جائے گا۔
