خشک جلد کیلئے سوپ : کوئی عام سا بیوٹی سوپ کدوکش کر لیں۔یہ ایک کھانے کا چمچہ، دودھ آدھا کپ، شہد ایک کھانے کا چمچہ، لیموں کا رس ایک کھانے کا چمچہ اور گلیسرین ایک کھانے کا چمچہ لے کر ان تمام اجزاء کو پتیلے میں ڈال کر چولہے پر چڑھا دیں۔ہلکی آنچ پر اتنا پکائیں کہ کدوکش کیا ہوا سوپ حل ہو جائے۔ حل ہونے کے بعد چولہے سے اُتار کر سوپ کے سانچے میں ڈال کر ٹھنڈا کرنے کیلئے رکھ دیں۔پوری رات کیلئے چھوڑ دیں، صبح چیک کریں گے تو آپ کا سوپ تیار ہو گا۔
چکنی جلد کیلئے سوپ : چکنی جلد تو قدرت کا انمول تحفہ ہوتی ہے۔چکنی جلد والی خواتین اگر اپنی جلد کی حفاظت طریقے سے کریں تو ہمیشہ جوان نظر آئیں گی۔ ایسی جلد کی حامل خواتین کے چہرے عموماً جھریوں سے پاک ہوتے ہیں۔ یہی وجہ ہے کہ چکنی جلد، خشک جلد کی نسبت زیادہ جوان اور پُرکشش نظر آتی ہے۔جہاں چکنی جلد کے بے شمار فوائد ہیں وہیں اگر آپ نے اپنی جلد کا خیال نہ رکھا تو آپ کو بے شمار جلدی مسائل بھی پیش آ سکتے ہیں۔ان مسائل سے بچنے کیلئے میں آپ کو ہوم میڈ سوپ بنانے کا طریقہ بتا رہی ہوں۔ سوپ تیار کرنے کیلئے عام بیوٹی سوپ کدوکش کیا ہوا ایک کھانے کا چمچہ، عرقِ گلاب آدھا کپ، گلاب کی پتیاں ایک چوتھائی کپ، شہد ایک چائے کا چمچہ اور مالٹے کے چھلکے پسے ہوئے ایک چائے کا چمچ لے کر ان اجزا کو دیگچی میں ڈال کر ہلکی آنچ پر اتنا پکائیں کہ سوپ حل ہو جائے۔ حل ہو جانے پر چولہے سے اُتار کر رکھ دیں اور ایک دن بعد سوپ جم جائے تو اسے استعمال کریں۔بہترین نتائج کیلئے صابن چہرے پر لگا کر دو منٹ تک چہرے کا مساج کریں، بہت جلد آپ کا چہرہ چمک اْٹھے گا۔
