پونے : ہندوستانی کرکٹ ٹیم 50 اوورس کی کرکٹ میں اپنی حکمت عملی اب تبدیل کرے گی کیوں کہ جمعہ کے دن کھیلے گئے مقابلے میں انگلش ٹیم نے جس انداز میں ایک ریکارڈ نشانے کا کامیاب تعاقب کیا ہے، اُس کے بعد ہندوستانی ٹیم مہمان ٹیم کے خلاف متواتر تیسری سیریز کامیابی کے لئے کوشاں ہے۔ ہندوستان جس نے انگلینڈ کے خلاف پہلے ہی ٹسٹ اور ٹی 20 سیریز اپنے نام کرلی ہے اور اب کل کھیلے جانے والے مقابلے میں کامیابی کے ذریعہ وہ سیریز کی ہیٹ ٹرک مکمل کرے گی تاہم اِس کے لئے یہ آسان نہیں ہوگا کیوں کہ جس طرح دوسرے مقابلے میں انگلینڈ نے 20 چھکے لگاتے ہوئے 333 رنز کا مطلوبہ نشانہ آسان انداز میں حاصل کرلیا ہے، اِس مقابلہ میں اسپنرس کلدیپ یادو اور کرنال پانڈیا انگلش بیٹسمنوں بین اسٹوک اور جانی بیرسٹو کا نشانہ بنے۔ کپتان ویراٹ کوہلی کو گزشتہ 3 ماہ کے دوران رویندر جڈیجہ کی کمی اتنی شدت سے محسوس نہیں ہوئی ہوگی جتنی جمعہ کے دن ہوئی ہوگی جب جانی اور اسٹوکس ہندوستانی اسپنرس کی پٹائی کررہے تھے۔ بولنگ شعبہ میں کلدیپ یادو نے منفی ریکارڈ درج کیا ہے۔ جیسا کہ انھوں نے اپنی بولنگ میں 8 چھکے دینے والے پہلے ہندوستانی بولر بنے ہیں جبکہ انھوں نے اس مقابلہ میں88 رنز دیئے۔ علاوہ ازیں پہلے مقابلے میں انھوں نے 64 رنز دیئے تھے۔ دوسری جانب کرنال پانڈیا کے مظاہرے مزید مایوس کن رہے جیسا کہ انھوں نے 6 اوورس میں 72 رنز دیئے اور فی اوور رنز دینے کا ان کا اوسط 12 تھا۔ اِن تمام حالات کے بعد ممکن ہے کہ اِن دو اسپنرس کو لیگ اسپنر یزویندر چہل اور واشنگٹن سندر کے ساتھ تبدیل کردیا جائے گا۔ سندر بیاٹنگ کرنے کی صلاحیت رکھتے ہیں۔ ہریانہ سے تعلق رکھنے والی چہل حالانکہ اپنے بہترین فام میں نہیں ہیں لیکن انہیں قطعی 11 کھلاڑیوں میں شامل کیا جاسکتا ہے۔ کرنال پانڈیا کو بھی ٹیم میں رکھا جاسکتا ہے کیوں کہ لوور آرڈر میں اِن کی بیاٹنگ صلاحیت سے ٹیم کو فائدہ ہوگا۔ ہندوستانی ٹیم اکثر اپنے آخری پندرہ اوورس میں تیزی سے رنز بنانے پر یقین رکھتی ہے اور ایک عرصہ تک اِس کے لئے مہندر سنگھ دھونی کی خدمات دستیاب تھیں۔ دوسری جانب انگلش ٹیم عالمی چمپئن ہے اور وہ اپنے اِس اعزاز کو برقرار رکھتے ہوئے ونڈے سیریز میں کامیابی حاصل کرتے ہوئے ہندوستان کا دورہ کامیابی پر ختم کرنے پر کوشاں ہوگی۔ انگلینڈ کے لئے آل راؤنڈر بین اسٹوک کا ٹاپ آرڈر پر بیاٹنگ کرنا فائدہ مند ہورہا ہے جیسا کہ گزشتہ مقابلے میں اسٹوک نے جہاں نمبر 3 پر بیاٹنگ کرتے ہوئے تیزی سے رنز بنائے جس کی بدولت بیرسٹو کو ایک طویل اننگز کھیلنے میں مدد ملی۔
سراج کی شمولیت کا امکان
پونے : انگلینڈ کے خلاف کل یہاں کھیلے جانے والے فیصلہ کن ونڈے میں فاسٹ بولر پریسدھ کرشنا اور تجربہ کار محمد سراج میں کسی ایک کا انتخاب اہم فیصلہ ہے۔ دونوں فاسٹ بولروں میں رفتار کرشنا کے حق میں ضرور ہے لیکن جمعہ کے دن کھیلے گئے مقابلے میں بین اسٹوک اور جانی بیرسٹو نے جس طرح بولروں کی پٹائی کی، اُس کے بعد اُمید کی جارہی ہے کہ قطعی 11 کھلاڑیوں میں محمد سراج کو موقع دیا جاسکتا ہے جبکہ یاکر کے ماہر ٹی نٹراجن کو بھی شردول ٹھاکر کے مقام پر ٹیم میں شامل کیا جاسکتا ہے۔ یاد رہے کہ ان دنوں سراج بہتر فام میں ہیں ۔
ریکارڈس کیلئے بیاٹنگ نہیں کرتا: کوہلی
پونے : ہندوستانی کرکٹ ٹیم کے کپتان ویراٹ کوہلی جنھوں نے انگلینڈ کے خلاف ابتدائی دو مقابلوں میں نصف سنچریاں اسکور کی ہیں اور ایک عرصہ سے وہ سنچری اسکور نہیں کرپائے ہیں۔ اِس ضمن میں اظہار خیال کرتے ہوئے کوہلی نے کہاکہ وہ سنگ میل عبور کرنے کے لئے بیاٹنگ نہیں کرتے یہی وجہ ہے کہ دو مقابلوں میں نصف سنچریاں اسکور کرنے کے باوجود موقع کی نزاکت اور رنز کی رفتار بڑھانے کے لئے انھوں نے تیز رفتار بیاٹنگ کی کوشش کی۔ کوہلی نے آخری مرتبہ ویسٹ انڈیز کے خلاف اگسٹ 2019 ء میں سنچری اسکور کی تھی، اس کے بعد متعدد مرتبہ نصف سنچریاں اسکور کرنے کے باوجود انھوں نے کوئی سنچری اسکور نہیں کی۔
