دبئی ۔ کرکٹ ویب سائٹ نے دعویٰ کیا ہے کہ چمپئنز ٹرافی پر آئی سی سی، پاکستان اور ہندوستان میں معاہدہ ہوا ہے ۔ پاکستان اور ہندوستان کے درمیان چمپئنز ٹرافی پر بھی فارمولا طے پایا ہے، 2027ء تک دونوں ٹیمیں ایک دوسرے کے ملک میں آئی سی سی ایونٹ کا میچ تیسرے مقام پرکھیلیں گی۔آئی سی سی نے چمپئنز ٹرافی 2025ء کے حوالے سے طویل عرصے سے جاری تعطل کا بالآخر حل نکال لیا ہے۔ معاہدے کے تحت 8 ٹیموں کے اس ایونٹ میں ہندوستان کے میچز ایک غیر جانبدار مقام پرکھیلے جائیں گے جبکہ بدلے میں آئی سی سی کے ان ایونٹس، جن کی میزبانی ہندوستان کرے گا، اس میں پاکستان اور ہندوستان کے میچز بھی تیسرے مقام پر منعقد ہوں گے۔ای ایس پی این کرک انفو نے اس معاہدے کی تفصیلات حاصل کر لی ہیں، جو آئی سی سی بورڈکے ووٹ کے بعد نافذ العمل ہوں گی، اس معاہدے کے مطابق 2024-2027ء کے ایونٹ سائیکل میں پاکستان میں منعقد ہونے والے ایونٹس میں ہندوستانکے میچز تیسرے مقام پر کھیلے جائیں گے۔ ہندوستان میں ہونے والے ایونٹس میں پاکستان کے میچز بھی تیسرے مقام پر منتقل کیے جائیں گے۔ یہ اصول چمپئنز ٹرافی 2025ء، خواتین کے ونڈے ورلڈکپ 2025ء اور مردوں کے ٹی ٹوئنٹی ورلڈ کپ 2026ء پر نافذ ہو گا، جو ہندوستان اور سری لنکا کی مشترکہ میزبانی میں ہوگا۔ علاوہ ازیں 2028ء میں منعقد ہونے والا خواتین کا ٹی ٹوئنٹی ورلڈکپ، جو آئندہ ایونٹ سائیکل کا پہلا ٹورنمنٹ ہوگا اور پاکستان کو اس کی میزبانی دی گئی ہے یہ بھی اس معاہدے کے تحت آ سکتا ہے۔ معاہدے کے مطابق تیسرے مقام کا انتخاب میزبان بورڈ کرے گا، جسے آئی سی سی کی منظوری درکار ہوگی۔آئی سی سی نے ایک سہ فریقی ٹی ٹوئنٹی سیریز کی تجویز پر بھی آمادگی ظاہرکی ہے، جس میں پاکستان، ہندوستان اورکسی اور ایشیائی مکمل رکن یا اسوسی ایٹ رکن ٹیم کو شامل کیا جا سکتا ہے۔ اس سیریز کا انعقاد بھی تیسرے مقام پر ہوگا، یہ تجویز پاکستان کو چمپئنز ٹرافی میں ہندوستان کے میچز کی میزبانی نہ ملنے کے ازالے کے طور پر پیش کی گئی ہے۔ یہ معاہدہ کرکٹ کی دنیا میں پاکستان اورہند کے درمیان تعلقات میں ایک نئے باب کا آغازہے۔
