میلبورن ۔ ہندوستانی کرکٹ ٹیم کے وکٹ کیپر بیٹر ریشبھ پنت نے کہا ہے کہ پاکستان اور ہندوستان کا مقابلہ ایک منفرد احساس دلاتا ہے جس میں آپ ہر لمحے مختلف احساس میں ہوتے ہیں۔انٹرنیشنل کرکٹ کونسل (آئی سی سی) کے پروگرام میں بات کرتے ہوئے ریشبھ پنت نے کہا کہ پاکستان کے خلاف کھیلنا ہمیشہ سے خاص رہا ہے کیوں کہ ہر طرف لوگوں کا شور ہوتا ہے۔ انہوں نے مزید کہا کہ ہند۔ پاک میچ میں خاص جوش و جذبہ ہوتا ہے اور قومی ترانے کے وقت کا ماحول ہی کچھ اور ہوتا ہے جس سے ہمارے رونگٹے کھڑے ہو جاتے ہیں۔ ریشبھ پنت نے مزید کہا کہ ویراٹ کوہلی کے ساتھ جب بیٹنگ کرتا ہوں تو وہ بہت کچھ سکھاتے ہیں کیونکہ وہ ایک تجربے کار بیٹر ہیں اس لیے دباؤ کو بہت اچھی طرح سے قابو کرتے ہیں۔واضح رہے کہ ورلڈ کپ میں پاکستان ٹیم اپنا پہلا میچ روایتی حریف ہندوستان کے خلاف 23 اکتوبر کو کھیلے گی اور اس مقابلے کا دنیائے کرکٹ کو انتظار ہے ۔
