l جان بوجھ کر مہاتما گاندھی کا نام ہٹانے کا الزام‘ اپوزیشن نے بل کی کاپیاں پھاڑ کر ایوان میں اچھال دیں
l بل کے خلاف سڑک سے پارلیمنٹ تک احتجاج جاری رکھنے کا اعلان،ایوان کی کارروائی کل تک ملتوی
نئی دہلی۔18؍ڈسمبر ( ایجنسیز) درمیان لوک سبھا میں آج شدید ہنگامہ آرائی اور اپوزیشن کے احتجاج کے درمیان منریگا اسکیم کا نام بدلنے والا ’وی بی–جی رام جی‘ (وکست بھارت-گارنٹی فار روزگار اینڈ آجیویکا مشن – گرامین) بل منظور کر لیا گیا۔ بل پر طویل بحث کے بعد ووٹنگ ہوئی، تاہم اس دوران ایوان میں غیر معمولی شور شرابہ دیکھنے کو ملا۔جوائنٹ پارلیمانی کمیٹی یا سلیکٹ کمیٹی سے رجوع کرنے اپوزیشن کا مطالبہ مسترد کردیا گیا۔ اپوزیشن ارکان نے حکومت پر مہاتما گاندھی کے نام کو جان بوجھ کر ہٹانے کا الزام لگایا اور احتجاجاً بل کی کاپیاں پھاڑ کر ایوان میں اچھال دیں جس کے بعد لوک سبھا کی کارروائی کل تک کیلئے ملتوی کر دی گئی۔ایوان میں جب مرکزی دیہی ترقیات کے وزیر شیوراج سنگھ چوہان بل پر اٹھائے گئے سوالات کے جواب کیلئے کھڑے ہوئے تو اپوزیشن کے ارکان ویل میں آ گئے اور نعرے بازی شروع کر دی۔ ہنگامہ بڑھنے پر اسپیکر نے نظم و ضبط قائم رکھنے کی اپیل کی مگر صورتِ حال قابو میں نہ آ سکی اور آخرکار کارروائی ملتوی کرنی پڑی۔حکومت کا کہنا ہے کہ ’وی بی–جی رام جی‘ بل کے ذریعے دیہی روزگار کے نظام کو زیادہ مؤثر، شفاف اور نتائج پر مبنی بنایا جائے گا جبکہ اپوزیشن کا الزام ہے کہ نام کی تبدیلی کے ساتھ ساتھ اسکیم کی روح اور حقیقی نوعیت کو کمزور کیا جا رہا ہے۔ اپوزیشن کے مطابق منریگا ایک مانگ پر مبنی حق ہے اور مجوزہ تبدیلیاں غریبوں، پسماندہ طبقات اور دلتوں کے مفادات کے خلاف ہیں۔اس سے قبل بل کے خلاف اپوزیشن جماعتوں نے پارلیمنٹ ہاؤس میں مارچ بھی نکالا تھا۔ اس احتجاج میں شامل رہنماؤں نے سوال اٹھایا کہ آخر حکومت کو مہاتما گاندھی کے نام سے کیا اعتراض ہے۔ کانگریس کے قومی صدر ملکارجن کھرگے نے میڈیا سے بات کرتے ہوئے کہا کہ یہ محض نام بدلنے کا معاملہ نہیں بلکہ کام کے حق کو محدود کرنے کی کوشش ہے۔ ان کے مطابق اگر اسکیم کی مانگ پر مبنی نوعیت ختم کی گئی تو حکومت کام دینے سے انکار کر کے یہ دعویٰ کر سکے گی کہ کوئی مانگ موجود نہیں۔کانگریس کے رکنِ پارلیمنٹ عمران مسعود نے کہا کہ منریگا نے غریبوں کو براہِ راست فائدہ پہنچایا ہے مگر حکومت اس کی جگہ محض نام بدلنے پر توجہ دے رہی ہے۔ انہوں نے الزام لگایا کہ اصل مسائل کو نظرانداز کر کے نمائشی اقدامات کیے جا رہے ہیں۔ کانگریس کے سینئر رہنما دگ وجے سنگھ نے کہا کہ بی جے پی تاریخی طور پر گاندھی کے نظریات کی مخالف رہی ہے، اسی لیے نام بدلنے کی ضرورت محسوس کی جا رہی ہے۔دیگر اپوزیشن ارکان نے بھی مرکز پر سخت تنقید کی۔ ان کا کہنا تھا کہ مرکز کی مالی شراکت میں کمی سے ریاستوں پر بوجھ بڑھے گا اور مجوزہ ترامیم سے مزدوروں کو نقصان پہنچے گا۔ اپوزیشن نے یہ بھی الزام لگایا کہ حکومت توجہ ہٹانے کے لیے متنازعہ تبدیلیاں لا رہی ہے جبکہ زمینی مسائل جوں کے توں ہیں۔ہنگامے کے بعد ایوان کی کارروائی ملتوی ہونے سے قانون سازی کا عمل رک گیا، تاہم حکومت نے واضح کیا ہے کہ وہ آئندہ دنوں میں بھی بل کے حق میں اپنا مؤقف مضبوطی سے پیش کرے گی، جبکہ اپوزیشن نے سڑک سے پارلیمنٹ تک احتجاج جاری رکھنے کا اعلان کیا ہے۔