لکھنؤ۔ کانگریس جنرل سکریٹری پرینکا گاندھی واڈرا نے ہفتہ کو کہا کہ مجرمین ۔ حکمراں جماعت اور افسران کے درمیان خفیہ تعلقات کی وجہ سے اترپردیش میں لاقانونیت کا دور دورہ ہے اور وہ انتہا کو پہنچ چکی ہے ۔ پرینکا گاندھی نے ویڈیو کانفرنسنگ کے ذریعہ ریاستی کانگریس کے اعلی لیڈروں سے بات چیت کی اور پارٹی کی حکمت عملی کے بارے میں تبادلہ خیال کیا۔اس دوران کانپور واقعہ کا ذکر کرتے ہوئے انہوں نے کہا کہ اقتدار سے پشت پناہی ملنے پر مجرمین کے حوصلے کافی بلند ہیں۔جس سے وہ اس بہیمانہ واردات کو انجام دے سکے ۔ انہوں نے کہا کہ ریاست میں جنگل راج کہنا مبالغہ آرائی نہیں ہوگی۔یہاں عام آدمی کا تحفظ کرنے والی پولیس ہی محفوظ نہیں ہے ۔ انہوں نے کہا کہ یوپی میں جنگل راج کے خلاف ان کی پارٹی مہم چلائے گی۔ اس کے تحت بڑھتے جرائم اور جنگل راج کے خلاف ہر ضلع میں پریس کانفریس منعقد کی جائے گی۔ پارٹی یوپی میں آن لائن مہم بھی چلائی گی۔ اس پروگرام کے تحت جنگل راج کے خلاف کل کانگریس کے لیڈر اور کارکن فیس بک لائیو کرتے نظر آئیں گے ۔ریاست میں بڑھتے جرائم کے خلاف آواز اٹھانے کے لئے لوگوں سے اپیل کی جائے گی۔انہوں نے اپیل کی کہ لوگ بڑھتے جرائم کے خلاف اپنا پیغام فیس بک لائیو، ٹوئٹر، انسٹا کے ذریعہ پوسٹ کرسکتے ہیں۔ اگر ان کو کوئی بھی دقت ہے تو اس ضمن میں وہ لیٹر لکھ کر ضلع کانگریس کمیٹی کے کارکنوں یا دیگر کانگریس لیڈروں کو دیں۔ان سبھی خطوط کو اکٹھا کر کے کانگریس پارٹی اترپردیش کے گورنر اور این ایچ آر سی کو دے گی۔
