نیویارک : سرقہ کی وارداتوں کی خبریں تو آئے دن آتی ہیں مگر چوری سے جڑی ایک تازہ خبر واردات کا تیز رفتاری سے انجام دینے کا واقعہ ہے۔ یہ واقعہ امریکہ میں پیش آیا جہاں چوروں نے 45 سیکنڈ میں جیولری کی دکان لوٹ لی۔ریکارڈ وقت میں4 مسلح ڈاکوؤں نے دن کی روشنی میں نیو یارک سٹی میں ایک زیورات کی دکان پر مسلح ڈکیتی کی۔ اس کے سیف کو تباہ کر دیا اور اس میں موجود زیورات لوٹ لیے۔دکان کے اندر اور باہر لگے سی سی ٹی کیمروں میں چوری کی واردات کو دیکھا جا سکتا ہے۔نیو یارک ڈیلی نیوز نے رپورٹ کیا کہ ویڈیو میں دکھایا گیا ہے کہ سارقین ماسک پہنے ہوئے تھے۔ انہوں نے 2 ملین ڈالر سے زیادہ کے زیورات کا سرقہ کیا ۔ ویڈیو کا آغاز ایک شخص سے ہوا جس نے اسٹور کا دروازہ کھولا اور وہاں کھڑا ہو کر بظاہر چوری کے جرم پر پردہ ڈال رہا تھا، پھر کالے کپڑے اور ماسک پہنے دو چور اندر داخل ہوئے اس کے بعد تیسرا اندر آیا۔ایک چور ہتھوڑے سے اسٹور میں موجود شیشے کے ڈبوں کو بھی توڑنے کے لیے آگے بڑھا جبکہ دوسرے نے زیورات لوٹ کر ایک بڑے تھیلے میں رکھ دیے۔یہ واردات جمعہ کی دوپہر 2-30 بجے پیش آئی۔ چوروں کو فرار ہونے میں صرف 45 سیکنڈ لگے۔عینی شاہدین کا کہنا تھا کہ ڈکیتی اتنی منظم تھی کہ ہتھوڑے کے وار اتنے زوردار تھے کہ انہیں لگا کہ انہیں گولیوں کی آوازیں سنائی دے رہی ہیں۔پولیس نے ملزمین کی شناخت کے لیے تفتیش شروع کردی ہے۔ امریکی پولیس نے چوروں کی گرفتاری میں مدد پر 3500 ڈالر انعام کا بھی اعلان کیا ہے۔
