جاپان، پاپوانیوگنی اور آسٹریلیا کے دورہ پر روانگی سے قبل وزیراعظم کا بیان
نئی دہلی: وزیر اعظم نریندر مودی نے جمعہ کو جاپان، پاپوا نیو گنی اور آسٹریلیا کے دورے پر روانہ ہونے سے پہلے کہا کہ میں جاپان کے وزیراعظم فومیو کشیدا کی دعوت پر جاپان کی صدارت میں منعقد ہونے والی G-7 سربراہ کانفرنس میں شرکت کرنے کے لئے ہیرو شیما، جاپان کے لئے روانہ ہو رہا ہوں۔ ہند۔جاپان سربراہ کانفرنس کے لئے اُن کے ہندوستانی دورے کے بعد وزیراعظم کشیدا سے ملاقات کرنا میرے لئے باعث مسرت ہوگا۔ مودی نے کہا کہ G-7 سربراہ کانفرنس میں میری شرکت خاص طور پر معنی خیز ہے ، اس لئے کہ اس سال ہندوستان جی -20 کی صدارت کر رہا ہے ۔ میں G-7 ممالک اور دیگر مدعو شراکت داروں کے ساتھ ان چیلنجوں پر، جن کا اس وقت دنیا کو سامنا ہے اور جن کا مل جُل کر ازالہ کرنے کی ضرورت ہے ، تبادلۂ خیال کرنے کا منتظر ہوں۔ ہیرو شیما میں منعقد ہونے والی G-7 سربراہ کانفرنس میں شرکت کرنے والے کچھ رہنماؤں کے ساتھ میری دو طرفہ ملاقات بھی رہے گی۔وزیراعظم نے مزید کہا کہ جاپان سے ، میں پورٹ موریسبی، پاپوا نیو گنی کا سفر کروں گا۔ یہ پاپوا نیوگنی کیلئے میرا پہلا دورہ ہونے کے علاوہ کسی بھی ہندوستانی وزیراعظم کی طرف سے کیا جانے والا اس ملک کا پہلا دورہ بھی ہوگا۔ میں، پاپوانیوگنی کے وزیراعظم جیمس مراپے کی شراکت داری میں ، ہند۔بحرالکاہل جزائر تعاون (ایف آئی پی آئی سی تیسری سربراہ کانفرنس) کیلئے اس فورم کی تیسری سربراہ کانفرنس کی 22 مئی 2023 کو میزبانی کروں گا۔ میں بحرالکاہل جزیرے کے 14ممالک کا شکر گزار ہوں کہ انہوں نے اس اہم سربراہ کانفرنس میں شرکت کے دعوت نامے کو قبول کیا۔ ایف آئی پی آئی سی کا آغاز 2014 میں میرے فیجی کے دورے کے دوران کیا گیا تھا اور میں پی آئی سی قائدین کے ساتھ ایسے امور پر تبادلۂ خیال کرنے کا منتظر ہوں، جو ہمیں ایک پلیٹ فارم پر اکٹھا کرتے ہیں۔
اور جن میں آب و ہوا کی تبدیلی اور پائیدار ترقی، صلاحیت سازی اور تربیت ، صحت اور بہبود ، بنیادی ڈھانچہ اور اقتصادی ترقی شامل ہیں۔انہوں نے مزید کہا کہ ایف آئی پی آئی سی کی مصروفیات کے علاوہ ، میں پپوا نیو گنی کے گورنر جنرل سر بوب ڈاڈے ، وزیراعظم مراپے اور اس سربراہ کانفرنس میں شرکت کرنے والے پی آئی سی کے دیگر رہنماؤں کے ساتھ دوطرفہ ملاقات اور تبادلہ خیال کا خواہشمند ہوں۔وزیراعظم نے بتایا کہ اس کے بعد میں سڈنی ، آسٹریلیا کا ، وہاں کے وزیراعظم البنیز کی دعوت پر دورہ کروں گا۔ میں دونوں فریقوں کے درمیان دو طرفہ ملاقات کا منتظر ہوں، جو کہ ہمارے دو طرفہ رشتوں کی صورتحال اور اس سال مارچ میں نئی دہلی میں منعقد ہونے والی ہند-آسٹریلیا پہلی سالانہ سربراہ کانفرنس پر عمل درآمد کا جائزہ لینے کے لئے ایک موقع فراہم کرے گی۔ میں آسٹریلیا ئی کمپنیوں کے سی ای اوز اور کاروباری رہنماؤں سے ملاقات کروں گا اور ایک خصوصی تقریب کے دوران سڈنی میں سکونت پذیر ہندوستانی برادری کے افراد سے ملاقات کروں گا۔