نئی دہلی: دہلی میں 25 سے 27 اگست تک آٹھویں ‘انڈین گلوبل ایم ایس ایم ای اسٹارٹ اپ نمائش اور کانفرنس 2022’ کا انعقاد کیا جائے گا جس میں پورے ملک کے چھوٹے کاروباری، چھوٹے تاجر، خود روزگار میں لگے نوجوان، خواتین، درج فہرست ذات اور درج فہرست قبائل اور دیہی صنعت کار شرکت کریں گے ۔چھوٹی صنعتوں کی تنظیم ایم ایس ایم ای ڈیولپمنٹ فورم کے صدر رجنیش گوئنکا نے منگل کو یہاں کہا کہ دہلی کے پرگتی میدان میں 25 سے 27 اگست تک تین روزہ ‘آٹھویں انڈین گلوبل ایم ایس ایم ای اسٹارٹ اپ نمائش اور کانفرنس 2022’ کا انعقاد کیا جائے گا۔ انہوں نے کہا کہ پہلے دن 25 اگست کو آل انڈیا اسمال انٹرپرینیورز کانفرنس کا انعقاد کیا جائے گا۔ اس میں ملک بھر سے چھوٹے کاروباریوں، چھوٹے تاجروں، خود روزگار سے وابستہ نوجوان، خواتین، کاروباری افراد اور ایس سی-ایس ٹی زمرے کے گاؤں والوں کو مدعو کیا گیا ہے ۔ اس کے علاوہ کانفرنس میں 15 ممالک کے ایک سو سے زائد مندوبین شرکت کریں گے ۔ ان میں امریکہ، متحدہ عرب امارات، بحرین، جاپان، برطانیہ، نائجیریا، ازبکستان، جنوبی افریقہ کے نمائندے شامل ہیں۔انہوں نے کہا کہ اس بار بیرون ملک سے شرکت کرنے والے سینکڑوں خریدار، سرمایہ کار، ٹیکنالوجی فراہم کرنے والے اور کنسلٹنٹس کانفرنس میں توجہ کا مرکز ہوں گے ۔ اس کے علاوہ کانفرنس میں اتر پردیش اور جموں و کشمیر ‘پارٹنر اسٹیٹس’ بنے ہیں اور ان کے مختلف ریاستوں کے مختلف اضلاع میں ‘ایک ضلع ایک پروڈکٹ’ کی تشہیر کی اسکیم کے تحت بننے والی 100 سے زیادہ دستکاری، ہینڈ لوم اشیاء کی نمائش کی جائے گی۔
