یروشلم : قابض صیہونی فوج نے مقبوضہ مغربی کنارہ میں تلاشی کے نام پر کارروائی کرتے ہوئے ایک گھر پر اندھا دھند گولیوں کی بارش کردی، جس سے تین فلسطینی نوجوان شہید ہوگئے۔ بین الاقوامی خبر رساں اداروں کے مطابق مقبوضہ مغربی کنارہ کے شہر نابلس میں اسرائیلی فورسز نے گھر گھر تلاشی لی۔ اس دوران ایک گھر پر بم پھینک کر اندر داخل ہوئے اور فائرنگ کردی۔ اس دوران پڑوس میں رہنے والے 2 نوجوان زخمی بھی ہوئے، جنہیں قریبی اسپتال منتقل کردیا گیا۔ زخمیوں میں سے ایک کی حالت نازک بتائی جا رہی ہے۔ اسرائیلی فوج نے الزام عائد کیا کہ مارے جانے والے 2 فلسطینی نوجوان مسلح تھے، جنہوں نے گزشتہ ماہ برطانوی نژاد اسرائیلی ماں لوسی لیہ ڈی اور ان کی 2 بیٹیوں مایا اور رینا کو مغربی کنارہ کے علاقہ وادیٔ اردن میں گولی مار کر قتل کر دیا تھا۔
