ممبئی: وزیر اعلیٰ دیویندر فڑنویس نے ریاستی قانون ساز کونسل میں اعلان کیا کہ مہاراشٹر پبلک سروس کمیشن (ایم پی ایس سی) کے تمام مسابقتی امتحانات مراٹھی زبان میں ہی منعقد کیے جائیں گے ۔ یہ اعلان شیوسینا (یو بی ٹی) کے قانون ساز ملند نارویکر کے سوال کے جواب میں کیا گیا، جنہوں نے توجہ دلائی کہ زراعت اور انجینئرنگ سے متعلق بعض امتحانات صرف انگریزی میں منعقد ہو رہے ہیں۔ انہوں نے سوال کیا کہ مراٹھی بولنے والے طلبہ کے لیے یہ امتحانات مراٹھی میں کیوں نہیں کروائے جا رہے ؟ وزیر اعلیٰ فڑنویس نے وضاحت کرتے ہوئے کہا کہ عمومی طور پر ایم پی ایس سی کے امتحانات مراٹھی اور انگریزی، دونوں زبانوں میں منعقد کیے جاتے ہیں۔ تاہم، کچھ تکنیکی مضامین خصوصاً زرعی انجینئرنگ کے امتحانات صرف انگریزی میں منعقد کرنے کا فیصلہ عدالت کے ایک حکم کے تحت کیا گیا تھا۔ انہوں نے بتایا کہ جب یہ معاملہ عدالت میں گیا تو حکومت نے اس پر غور کیا اور پایا کہ زرعی انجینئرنگ جیسے مضامین کی نصابی کتابیں مراٹھی زبان میں دستیاب نہیں ہیں۔
عدالت کو اس صورتحال سے آگاہ کیا گیا، جس کے بعد اس نے حکومت کے مؤقف کو قبول کر لیا۔
وزیر اعلیٰ نے کہا کہ تکنیکی اور انجینئرنگ مضامین کے لیے مراٹھی نصابی کتابیں تیار کرنے کا عمل جاری ہے ۔ انہوں نے مزید وضاحت کی کہ نئی تعلیمی پالیسی کے تحت انجینئرنگ کورسز کو مراٹھی میں پڑھانے کی اجازت دی گئی ہے ، جس کی روشنی میں ایم پی ایس سی امتحانات کو مراٹھی زبان میں منعقد کرنے کے لیے اقدامات کیے جا رہے ہیں۔
فڑنویس نے یقین دہانی کرائی کہ ایم پی ایس سی کے ساتھ مشاورت کر کے ایک مقررہ ٹائم لائن طے کی جائے گی، تاکہ وہ امتحانات جو ابھی تک مراٹھی میں نہیں ہو رہے ، جلد ہی مراٹھی زبان میں بھی دستیاب ہوں۔
