جلوس جنازہ میں محمد یونس سمیت ہزاروں افراد کی شرکت
ڈھاکا۔20؍ڈسمبر( ایجنسیز ) بنگلہ دیش میں طلبا تحریک کے سرکردہ رہنما 32سالہ شریف عثمان ہادی کو سپرد خاک کر دیا گیا۔ بنگلہ دیشی میڈیا کے مطابق قاتلانہ حملے میں شدید زخمی سنگاپور میں دوران علاج دم توڑنے والے انقلاب منچہ کے ترجمان شریف عثمان ہادی کی نماز جنازہ ڈھاکہ میں پارلیمنٹ کے ساؤتھ پلازا میں ادا کی گئی۔میڈیا رپورٹس کے مطابق شریف عثمان ہادی کی نماز جنازہ میں چیف ایڈوائزر بنگلہ دیش محمد یونس سمیت ہزاروں افراد نے شرکت کی۔ بعدزاں بنگلہ دیش کی طلبہ تحریک کے رہنما شریف عثمان ہادی کو ہزاروں افراد کی موجودگی میں بہ دیدہ نم سپرد خاک کر دیا گیا۔یاد رہے کہ بنگلہ دیش کے اسٹوڈنٹ لیڈر شریف عثمان ہادی کی میت گزشتہ روز سنگاپور سے ڈھاکا پہنچائی گئی تھی جبکہ چیف ایڈوائزر بنگلہ دیش محمد یونس نے عثمان ہادی کے انتقال پر ایک روزہ سوگ کا اعلان بھی کیا تھا۔شریف عثمان ہادی جمعرات کی شب سنگاپور جنرل ہاسپٹل میں انتقال کر گئے تھے۔ 12 دسمبر کو ڈھاکہ کے علاقے پرانا پلٹن میں انتخابی مہم کے دوران حملہ آوروں کی فائرنگ سے ان کے سر پر شدید زخم آئے تھے۔ابتدائی طور پر انہیں ڈھاکہ میڈیکل کالج ہاسپٹل اور ایور کیئر ہاسپٹل منتقل کیا گیا، جس کے بعد 15 دسمبر کو بہتر علاج کیلئے سنگاپور لیجایا گیا جہاں وہ زخموں کی تاب نہ لاتے ہوئے چل بسے۔شریف عثمان ہادی جولائی 2025 میں حسینہ واجد حکومت کا تختہ الٹنے والی طلبہ تحریک کے اہم رہنما تھے اور طلبہ رہنماؤں کے قائم کردہ سیاسی پلیٹ فارم انقلاب منچہ کے ترجمان بھی تھے۔ بنگلہ دیش میں یوم سوگ منایا گیا۔