حیدرآباد ۔ تھکن ایک عام شکایت ہے، جس سے مَرد، عورت، بچّے، بوڑھے یا جوان کوئی فرار نہیں، خاص طور پر موجودہ تیز رفتار دَور میں یہ ایک بیماری بن چْکی ہے۔ ایک ایسی بیماری، جو کئی بیماریوں کو جنم دینے کی موجب بن سکتی ہے۔ تھکن دراصل ایک کیفیت کا نام ہے، جس میں جسمانی توانائی اور ہمّت جواب دے جاتی ہے۔ ۔ یوں سْستی و کاہلی انہیں گھیر لیتی ہے۔ عام تاثر یہی ہے کہ تھکن صرف کام کی زیادتی یا کمزوری کے سبب ہوتی ہے۔ ہر چند کہ بنیادی وجوہ یہی تصوّر کی جاتی ہیں لیکن کئی طبّی، جذباتی اور نفسیاتی محرّکات بھی تھکن کا باعث ثابت ہوسکتے ہیں۔جو افراد غذائی قلّت کا شکار ہوں یا غیر متوازن غذا استعمال کرتے ہوں، وہ بھی جلد تھکاوٹ کا شکار ہوجاتے ہیں ۔ اگرکھانے پینے کے اوقات کی پابندی میں احتیاط سے کام لیا جائے، بطور غذا،جلد ہضم اور مقوی چیزوں کا انتخاب کیا جائے، تو اس قسم کی تھکن سے چھٹکارا حاصل کیا جا سکتا ہے۔ایسے افراد جو ناپسندیدہ ماحول میں مصروفِ عمل ہوں یا کسی ایسے فرد کے ساتھ کام کرنے پر مجبور ہوں، جس سے ذہنی ہم آہنگی نہ ہو، چپقلش رہتی ہو یا کام کی نوعیت ہی ایسی ہو جس میں دِلچسپی نہ ہو، تو وہ بہت جلد تھک جاتے ہیں۔۔ہمارے گلے میں ایک غدود، تھائی رائڈ گلینڈ پایا جاتا ہے، جو انہضام و انجذاب کا نظام کنٹرول کرتا ہے۔ اگر یہ غدود غیر فعال ہوجائے، تو انہضام و انجذاب کا نظام سْست پڑجاتا ہے، نتیجتاً جسم میں غذائی کمی کے باعث تھکن محسوس ہونے لگتی ہے۔ عمومی طور پر کیفین جسم میں خون کو تحریک دے کر متحرک رکھتی ہے، لیکن اس کی زیادتی بھی تھکن میں مبتلا کرسکتی ہے۔
توانائی فراہم کرنے والی غذائیں: مچھلی میں تقریباً تمام وٹامنزاور معدنی نمکیات پائے جاتے ہیں، جب کہ اس میں صحت بخش چکنائی بھی موجود ہوتی ہے، جو غذا کے انہضام اور انجذاب کے نظام کو بہترکرتی ہے۔ مچھلی کا استعمال تھکن کے مریضوں کے لیے بہت مفید ثابت ہو سکتا ہے۔کیلا : پوٹاشیم اور نشاستے سے بَھرپور ہوتا ہے،اس کے استعمال سے بھی جسم میں توانائی کا احساس غالب رہتا ہیاور تھکن جاتی رہتی ہے۔ ترش پھل بھی وٹامنز سے بَھرپور ہوتے ہیں،جو تھکن پیدا کرنے والے کورٹیسول نامی ہارمون کی مقدار کم کردیتے ہیں۔سیب کا استعمال بھی مفید ثابت ہوتا ہے۔تربوز جسم میں پانی کی کمی دْور کرکے ہشّاش بشّاش رکھتا ہے۔مغزیات، لحمیات اور غذائی ریشے سے بَھرپور ہوتے ہیں۔ ہر روز بادام، اخروٹ اور مونگ پھلی کا توازن سے استعمال جسم کو فوری توانائی فراہم کرتا ہے اور تھکن کا احساس زائل کر دیتا ہے۔زیادہ پانی پینا بھی جسمانی تھکن دور کرتا ہے۔
