برلن۔ جرمنی کے مغربی صوبہ رائن لینڈ پلاٹینیٹ کی وادی آر میں تقریباً ڈیڑھ ماہ قبل آئے سیلاب کے بعد چانسلر مرکل نے وہاں جاری بحالی کی سرگرمیوں اور تعمیراتی کاموں کا جائزہ لینے کے لیے دوسری مرتبہ دورہ کیا۔ چانسلر مرکل نے علاقہ کے متاثرین کو یقین دلایا کہ حکومت ان کی مدد جاری رکھے گی۔ اس دوران متاثرہ صوبہ کی خاتون وزیر اعلیٰ مالْو ڈرائر بھی چانسلر مرکل کے ہمراہ تھیں۔ ڈرائر نے کہا کہ سیلابی تباہ کاریوں کے باوجود امدادی سرگرمیوں میں نمایاں پیش رفت دیکھی جا سکتی ہے۔ جولائی کے وسط میں مغربی جرمنی میں آنے والے سیلابوں کے نتیجے میں مجموعی طور پر 189 افراد ہلاک ہوئے تھے، جس میں سے 133 وادی آر کے رہائشی تھے۔
