درگاپور ۔15 اکتوبر ۔ ( یو این آئی ) مغربی بنگال میں درگاپور میڈیکل کالج اجتماعی عصمت دری معاملے میں متاثرہ کے دوست واصف علی کو پوچھ گچھ کے بعد گرفتار کر لیا گیا ہے۔ سرکاری ذرائع نے چہارشنبہ کو یہ اطلاع دی۔ 10 اکتوبر کی رات کو یہ واقعہ منظر عام پر آنے کے بعد سے وہ زیر تفتیش تھا۔درگاپور ۔آسنسول پولیس کمشنر سنیل چودھری نے کہا کہ آئی کیو سٹی میڈیکل کالج کے قریب پارنگُنج جنگل میں ملزمان کے ساتھ جرم کا منظر دوبارہ پیدا کرنے کے کچھ ہی گھنٹے کے بعد منگل کی رات میڈیکل کے طالب علم واصف کو گرفتار کیا گیا تھا، اس کے ساتھ ہی 11 اکتوبر سے اب تک چھ مشتبہ افراد کو گرفتار کیا جا چکا ہے ۔ چودھری نے کہا کہ واصف ہماری تفتیش کے دائرہ سے باہر نہیں ہے اور اس معاملے میں اس کے کپڑوں کی بھی جانچ کی جائے گی۔ تحقیقات کے دوران ملنے والے شواہد کی بنیاد پر ہم اس کے خلاف کارروائی کریں گے ۔ذرائع نے بتایا کہ واصف کو کل رات جرم کے منظر کو دوبارہ بناتے ہوئے پولیس کی طرف سے پوچھ گچھ کے بعد گرفتار کیا گیا تھا۔ لازمی طبی معائنے کے بعد اسے آج عدالت میں پیش کیا جائے گا۔ پولیس نے نصیر الدین اور ریاض الدین کے گھروں سے اُن کے کپڑے ضبط کر لیے تھے ۔
