کجریوال کو روکنے کی کوشش کا الزام‘سی بی آئی دھاوے کے بعد دہلی کے وزیر کا بیان
نئی دہلی: شراب سے متعلق ایکسائز پالیسی میں مبینہ اسکام میںسی بی آئی کے دھاوے کے بعد دہلی کے نائب وزیر اعلیٰ منیش سسودیا نے ہفتہ کو میڈیا سے خطاب کرتے ہوئے بی جے پی اور وزیر اعظم مودی پر شدید تنقید کی اور دعویٰ کیا کہ انہیں دو چار دن میں گرفتار کر لیا جائے گا، ساتھ ہی عام آدمی پارٹی کے دیگر قائدین کو بھی گرفتار کیا جائے گا، نیز یہ سب کیجریوال کو روکنے کے لئے کیا جا رہا ہے۔ سسودیا نے کہا ’’کل سی بی آئی کے عہدیدار تشریف لائے تھے۔ انہوں نے گھر اور دفتر پر دھاوا کیا۔ تمام عہدیدار بہت اچھے تھے۔ ان کو تو اوپر سے حکم ملا ہے، جس پر انہیں عمل کرنا ہے۔ انہوں نے دعویٰ کیا ہے کہ اگلے دو چار دنوں میں انہیں جیل بھیجا جا سکتا ہے اور اس کی تیاری کی جا رہی ہے۔ ایکسائز پالیسی میں مبینہ اسکام کو بے بنیاد قرار دیتے ہوئے نائب وزیر اعلیٰ نے کہا کہ گجرات میں 10000 کروڑ روپے کی ایکسائز ڈیوٹی کی چوری ہو رہی ہے۔ انہوں نے کہا کہ شراب اسکام کرپشن کا مسئلہ ہی نہیں۔ انہوں نے کہا کہ بی جے پی‘ پارٹی عام آدمی پارٹی کی مقبولیت کو ہضم نہیں کر پا رہی ہے۔ میرے خلاف جو کارروائی کی جا رہی ہے وہ اس بات کا اشارہ ہے کہ وہ وزیر اعلیٰ اروند کیجریوال اور ان کی حکومت کی پالیسیوں سے خوفزدہ ہیں۔‘‘انہوں نے الزام لگایا کہ مرکزی حکومت اور بی جے پی دہلی کے صحت اور تعلیم کے ماڈل کو آگے بڑھنے سے روکنا چاہتی ہے۔ ڈپٹی سی ایم نے کہا کہ وہ سی ایم اروند کیجریوال کو آگے بڑھنے سے روکنا چاہتے ہیں۔ انہوں نے کہا کہ 2024 کا الیکشن کیجریوال بمقابلہ مودی ہوگا۔اس کے علاوہ نائب وزیر اعلیٰ نے دہلی کے تعلیمی نظام پر امریکی اخبار نیویارک ٹائمز میں شائع خبر کا ذکر کیا۔ پریس کانفرنس میں ڈپٹی سی ایم نے ڈیڑھ سال پرانی خبر کا حوالہ دیا جس میں ہندوستان میں کورونا کے دوران مرنے والوں کی آخری رسومات کی تصویر چھپی تھی۔ انہوں نے کہا کہ کل امریکہ کے سب سے بڑے اخبار میں دہلی کے تعلیمی ماڈل کی تعریف کی جا رہی ہے۔ یہ ہمارے لیے فخر کی بات ہے۔ ایک سال پہلے کووڈ کی وجہ سے موت کیسے ہوئی؟ اس وقت جب یہ اخبار چھپا تھا تو ہمیں شرم آتی تھی۔سی بی آئی کے دھاوے کے بعد عام آدمی پارٹی اور بی جے پی قائدین میں زبردست لفظی جنگ چل رہی ہے ۔
