حافظ محمد ہاشم صدیقی
گزشتہ سے پیوستہ … ’’اے لوگو! ہم نے تمہیں ایک مرد اور ایک عورت سے پیداکیا اور تمہیں شاخیں اور قبیلے کیا کہ آپس میں پہچان رکھو، بے شک اللہ کے یہاں تم میں زیادہ عزت والا وہ ہے جو تم میں زیادہ پرہیز گار ہے۔‘‘ (سورۃ الحجرات ۔۱۳)
اہم بات یہ ہے کہ پیدائشی لحاظ سے تمام انسان یکساں ہیں۔ انعاماتِ الٰہیہ سے سب انسان نوازے گئے مگر ان کا صحیح اور بر محل استعمال کرکے اللہ تعالیٰ کا خوف، تقویٰ حاصل کرنے والا انجام کار میں سب سے بہتر و افضل ہے۔حضرت علی مرتضیٰ رضی اللہ عنہ نے فرمایا:’’ شکل و صورت کے لحاظ سے سب انسان برابر ہیں، آدم ؑان سب کے باپ اور حوّا ؑسب کی ماں ہیں۔‘‘ اسی تخلیقی برابری کے باعث آدم و حوّا علیہم السلام کی سب اولاد آپس میں بھائی بھائی ہیں۔ الگ الگ قومیں اور جداجدا خاندانوں اور قبیلوں کا مصرف یہ ہے کہ انسانوں کو باہمی تعارف میں آسانی ہو اور ملنے جلنے میں سہولت ہو۔ قبیلے اور قوموں کے ذریعہ فخر و مباہات یا کسی کی تحقیر و تذلیل ہرگز نہیں ہونی چاہیے۔ اسلام نے بھید بھاؤ کی خاردار جھاڑیوں کو کاٹ کر پھینک دیا ہے لیکن آج ترقی یافتہ کہلانے کے باوجود سار ی دنیا خاص کر مغربی ممالک میں یہ عصبیت مضبوط سے مضبوط تر ہوتی جارہی ہے۔طاقتور ممالک غریب اور مفلس علاقوں کو آج تک اسی طرح ظلم و ستم کا نشانہ بناتے ہیں ۔ جس طرح امریکہ کی سرزمین پر انسانوں کے جسم میں خون ہے اور وہاں کے انسان قابلِ قدر ہیں، بالکل اسی طرح باقی دنیا فلسطین، ویتنام ، افغانستان، مصر ، لیبیا، افریقی ممالک وغیرہ کے انسان بھی قابلِ عزت ہیں۔ بارہ ربیع الاوّل کو پیدا ہونے والے محسنِ کائنات ﷺ کا پیغام ماننا ہی دنیا کی ساری قوموں کے لئے نسخۂ کیمیا ہے۔ بھٹکے ہوئے انسانوں کے لئے اسی پیغام میں جو سب کے لئے ہے سب جگہ کے لئے ہے، راحت ہے۔ اس میں مرد وعورت، بوڑھے ، جوان ، کنبہ و خاندان، حاکم و محکوم سبھی کے لئے آرام و راحت اور سکون و اطمینان کا سامان ہے اور اس کا عملی نمونہ بھی خلافت راشدہ کے زمانے میں پورے ۳۶ سال تک دنیا دیکھ چکی ہے اور اس کا میٹھا پھل بھی کھا چکی ہے۔ آپ ﷺکی عطا کردہ تعلیم سے نسلی و قبائلی برتری کے تمام بت پاش پاش ہوگئے یہ مساواتِ اسلامی زندگی کے ہر گوشے میں نظر آتی ہے۔ رسول اللہ ﷺنے انسانوں کے لئے جو دستورِ حیات دیا وہ صرف دستور کی حد تک نہیں رہا بلکہ اللہ کے رسول ﷺنے اس کے ایک ایک حکم پر عمل کرکے ، نافذ کرکے دکھا دیااور حکم دیا کہ اُسوئہ رسول ﷺ پر چل کر زندگی گزارو۔
اخلاق و شمائل رسول اللہ : آپ ﷺکا فرمان ہے : ’’میری بعثت اس لئے ہوئی کہ میں اخلاق کی تعلیم کو مکمل کروں۔‘‘ رسول اللہ ﷺ کے اخلاق عالیہ ، اوصافِ جمیلہ اور حلیہ مبارک ، اوصافِ کریمہ اور فضائلِ شریفہ کا ذکر صحابیِ رسول ہند ابی ہالہ رضی اللہ عنہ نے ،جو اُم المومنین حضرت خدیجہ رضی اللہ عنہا کے فرزند اور حضرت حسن و حسین رضی اللہ عنہما کے ماموں ہیں اور آپؓ کو وصاف النبیؐ (حضور کے اوصاف بتانے والے) بھی کہا جاتا ہے،بہت جامع اور بلیغ انداز میں کیا ہے، ان کے الفاظ یہ ہیں: ’’رسول اللہ ﷺ طبعاً بدکلامی اور بے حیائی و بے شرمی سے دور تھے اور تکلفاً بھی ایسی کوئی بات آپ سے سرزد نہیں ہوتی تھی۔ بازاروں میں آپؐ کبھی آواز بلند نہ فرماتے، برائی کا بدلہ برائی سے نہ دیتے بلکہ عفو درگزر کا معاملہ فرماتے۔ آپؐ نے کسی پر کبھی دست درازی نہ فرمائی سوائے اس کے کہ جہاد فی سبیل اللہ کا موقع ہو، کسی خادم یا عورت پر آپؐ نے کبھی ہاتھ نہیں اُٹھایا۔‘‘ہند ابی ہالہ آگے فرماتے ہیں : ’’ میں نے آپؐ کو کسی ظلم و زیادتی کا انتقام لیتے ہوئے بھی نہ دیکھا جب تک کہ اللہ تعالیٰ کی مقرر کردہ حدود کی خلاف ورزی نہ ہو اور حدود اللہ کی حرمت و ناموس پر آنچ نہ آئے۔ ہاں، اگراللہ تعالیٰ کے کسی حکم کو پامال کیا جاتااور اس کے ناموس پر حرف آتا تو آپ ہر شخص سے زیادہ غصہ فرماتے تھے ۔ دو چیزیں سامنے ہوتیںتو آپؐ ہمیشہ آسان چیز کا انتخاب فرماتے۔ جب اپنے دولت خانہ پر تشریف لاتے تو اپنے کپڑوں کو صاف فرماتے، بکری کا دودھ دوہتے اور اپنی ضرورتیں خود انجام دیتے، اپنی زبان مبارک محفوظ رکھتے، صرف اور صرف اسی چیز کے لئے کھولتے جس سے آپؐ کو کچھ سروکار ہوتا۔ لوگوں کی دلداری فرماتے اور ان کو متنفر نہ کرتے تھے۔‘‘
سیرت محمدی کا پیغام: آپؐ ہر وقت آخرت کی فکر میں اور امورِ آخرت کی سوچ میں رہتے، اس کا ایک تسلسل قائم تھا کہ کسی وقت آپؐ کو چین نہیں ہوتا تھا۔ غلاموں سے بھی محبت کا سلوک فرماتے تھے ۔ آپؐ ایک مرتبہ مدینہ منورہ کے بازار میں تشریف لے گئے ۔ وہاں ملاحظہ فرمایا کہ ایک غلام یہ کہہ رہا ہے کہ جو مجھے خرید ے وہ مجھے رسول اللہ کے پیچھے پنجگانہ نماز سے نہ روکے۔ اسے ایک شخص نے خریدلیا۔ کچھ دنوں کے بعد وہ غلام سخت بیمار ہوگیا ۔ اللہ کے رسول اس کی تیمارداری کو تشریف لے گئے ،پھر اس کی وفات ہوگئی تو حضور اس کے دفن میں شریک ہوئے ۔ اس پر بہت سے لوگوں نے حیرانی کا اظہار کیا کہ غلام اور اس پر اتنا انعام۔
آپ کے اخلاقِ کریمانہ پر یہ آیت نازل ہوئی : تم میں زیادہ عزت والا وہ ہے جو تم میں متقی و پرہیزگارہو ، نسب و حسب کی کوئی حقیقت نہیں۔
حضرت ہند بن ابی ہالہ ؓ فرماتے ہیں :
’’آپ اکثر طویل سکوت اختیار فرماتے تھے ، بلا ضرورت کلام نہ فرماتے۔ آپ کی گفتگو اور بیان بہت صاف ، واضح اور دو ٹوک ہوتاتھا، نہ اس میں غیر ضروری طوالت ہوتی نہ زیادہ اختصار۔ آپ نرم مزاج و نرم گفتار تھے، درشت اور بے مروت نہ تھے۔ آپ کسی کی اہانت نہ کرتے اور نہ اپنے لئے اہانت پسند کرتے تھے۔ نعمت کی بڑی قدر کرتے اور اس کو بہت زیادہ جانتے تھے خواہ کتنی ہی قلیل ہو،نعمت کی برائی نہ فرماتے۔ دنیا اور دنیا سے متعلق جو چیز ہوتی اس پر آپ کوکبھی غصہ نہ آتا لیکن جب رب العالمین کے کسی حق کو پامال کیا جاتا تو اُسوقت آپ کے جلال کے سامنے کوئی چیز نہ ٹھہر سکتی تھی، یہاں تک کہ آپ اس کا بدلہ لے لیتے۔ آپ کو اپنی ذات کے لئے غصہ نہ آتا، نہ ہی اپنی ذات کیلئے انتقام لیتے تھے۔جب کسی کی طرف اشارہ فرماتے تو پورے ہاتھ کے ساتھ اشارہ فرماتے۔ غصہ اور ناگواری کی بات ہوتی تو روئے انور اس طرف سے پھیر لیتے اور اعراض فرما لیتے۔ خوش ہوتے تو نظریں جھکا لیتے۔ آپ کا ہنسنا زیادہ تر تبسم تھا جس سے صرف آپ کے دندانِ مبارک ،جو بارش کے اولوں کی طرح پاک شفاف تھے ، ظاہر ہوتے تھے۔‘‘ ہند بن ابی ہالہ رضی اللہ عنہ مزید بیان کرتے ہیں:آپ خود دار اور باوقار اور شان و شوکت کے حامل تھے اور دوسروں کی نگاہ میں بھی نہایت پر شکوہ ، آپ کا روئے انور چودھویں رات کے چاند کی طرح دمکتا تھا۔
حضرت علی رضی اللہ عنہ فرماتے ہیں :
رسول اللہ ہمہ وقت کشادہ رُو اور انبساط و بشاشت کے ساتھ رہتے تھے۔ بہت نرم اخلاق، نرم پہلو تھے۔ نہ سخت طبیعت کے تھے نہ سخت بات کہنے کے عادی ، نہ چلاکر بولنے والے نہ کسی کو عیب لگانے والے، نہ تنگ دل نہ بخیل۔3 باتوں سے آپ نے اپنے کو بالکل بچا کر رکھا : ایک جھگڑا، دوسرے تکبر اور تیسرے غیر ضروری اور لا یعنی کام۔
لوگوں کو بھی 3 باتوں سے آپ نے بچارکھا تھا: نہ کسی کی برائی کرتے نہ اس کو عیب لگاتے تھے اور نہ اس کی کمزوریوں اور پوشیدہ باتوں کے پیچھے پڑتے تھے۔
آپ صرف وہ کلام فرماتے تھے جس پر ثواب کی امید ہوتی تھی۔ جب گفتگو فرماتے تو شرکائے مجلس ادب سے اس طرح سر جھکا لیتے تھے کہ معلوم ہوتا تھا کہ ان سب کے سروں پر چڑیا ں بیٹھی ہوئی ہیں۔
اللہ تعالیٰ نے اپنے نبی کو لباس و جمال و کمال سے آراستہ فرمایا تھااور آپ کو محبت و دلکشی اور رعب و ہیبت کا حسین و جمیل پیکر بنایا تھا۔
براء بن عازب رضی اللہ عنہ بیان فرماتے ہیں کہ رسول اللہ میانہ قد تھے۔ میں نے آپ کو ایک مرتبہ سرخ قبا میں دیکھا ،اس سے اچھی کوئی چیز میں نے کبھی نہیں دیکھی ۔‘‘
حضرت ابو ہریرہ رضی اللہ عنہ بیان فرماتے ہیں کہ رسول اللہ میانہ قد تھے ،طول کی طرف کسی قدر مائل، رنگ نہایت گورا،ریش مبارک کے بال سیاہ، دہانہ نہایت متناسب اور حسین، آنکھوں کی پلکیں دراز ، چوڑے شانے۔ آخر میں کہتے ہیں کہ میں نے آپ جیسا آپ کے پہلے یا آپ کے بعد کبھی نہیں دیکھا۔
حضرت انس رضی اللہ عنہ راوی ہیں کہ میں نے حریر و دیباج کو بھی آپ کے دست مبارک سے زیادہ نرم نہیں پایا۔ نہ آپ کی خوشبو سے بڑھ کر کوئی خوشبو سونگھی۔ اللہ کے رسول کے اخلاق و شمائل کا یہ ایک مختصر خاکہ ہے۔ آپ کی سیرت لکھنے کے لئے بڑے سے بڑے دفتر بھی کم پڑ جائیں گے۔
طَلْـعَ الْـبَدْرُ عَلَیْـَنامِنْ ثَنِیَّاتِ الْوِدَاعِ
وَجَب الشُّکْرُ عَلَیْنَا مَا دَعَا لِلّٰہِ دَاعِ
(وہ مثل ماہِ کامل ہم میں آئےثنیات الوداع کے راستے سے،اب ان کا شکر واجب ہم پہ ٹھہرے کہ داعی حق کی دعوت دینے آئے)
سیرت رسول اللہ اور ہماری ذمہ داری:
ضرورت اس بات کی ہے کہ ہم تمام اہلِ ایمان آپ کی سیرت اورآپکی تعلیم پر عمل پیرا ہو کر نہ صرف اپنی دنیا و آخرت سنواریں بلکہ ساری دنیا کو بھی اس پیغام سے روشناس کرائیں۔ اسلام کی تبلیغ میں جہاں قرآن پاک ، کلامِ الٰہی و احادیث نبویؐ کا کردار ہے وہیں سیرت نبوی آپ کی عملی زندگی ، صحابہ کرام ، اولیاء اللہ کی زندگیاں اور ان کا اخلاق و کردار بھی اسلام کی تبلیغ کا ذریعہ بنا۔ ہم کو بھی اسلامی سفیر بن کر عملی زندگی سے دوسروں تک اسلام کا پیغام ِامن پہنچانے کی پوری کوشش کرنی ہوگی تبھی ہم بہترین امت کہلانے کے حقدار ہوں گے، تبھی ہم ساری دنیا سے دہشتگردی، انتہا پسندی اور ظلم و جبر کا خاتمہ کرنے کی پوزیشن میں آئیں گے۔
ہم سب ربیع الاول کے پیغامِ محمدیؐ کو اپنے سینے سے لگائیں۔ اپنا محاسبہ کریں ، جائزہ لیں کہ ہمارے اندر تعلیماتِ رسول اللہ کا عملی حصہ کتنا پایا جاتا ہے۔
اللہ تعالیٰ ہم تمام مسلمانوں کو عمل کی توفیقِ رفیق عطا فرمائے۔ آمین ثم آمین۔
