نئی دہلی 11 نومبر راجیہ سبھا کے صدرنشین وینکیا نائیڈو نے کانگریس کے سینئر لیڈر اور سابق وزیراعظم منموہن سنگھ کو ان کی پارٹی کے رفیق کار ڈگ وجئے سنگھ کے بجائے پارلیمانی کمیٹی برائے فینانس کے لئے نامزد کیا ہے۔ راجیہ سبھا بلیٹن کے مطابق ایوان بالا کے صدرنشین نے ڈگ وجئے سنگھ کو پارلیمانی کمیٹی برائے شہری ترقیات مقرر کیا ہے۔
بلیٹن میں مزید کہا گیا ہے کہ ’راجیہ سبھا کے صدرنشین نے راجیہ سبھا کے رکن منموہن سنگھ کو ڈگ وجئے سنگھ کے بجائے فینانس کمیٹی کا رکن نامزد کیا ہے۔ صدرنشین نے راجیہ سبھا کے رکن ڈگ وجئے سنگھ کو شہری ترقیات کمیٹی کا رکن نامزد کیا ہے‘۔ ذرائع کے مطابق سابق وزیراعظم منموہن سنگھ کے لئے راہ ہموار کرنے کے مقصد سے ڈگ وجئے سنگھ فینانس کمیٹی سے مستعفی ہوگئے تھے۔ ڈاکٹر سنگھ ماضی میں 2014 ء سے 2019 ء اس ایوان کی رکنیت کے اختتام تک فینانس کمیٹی کے رکن رہ چکے ہیں۔