کورونا وائرس سے لڑنے بیرونی دوروں کو روکا جائے ،مصارف بجٹ میں کٹوتی کیلئے صدر کانگریس کا وزیراعظم کو مکتوب
نئی دہلی۔7 اپریل (سیاست ڈاٹ کام)کانگریس کی صدر سونیا گاندھی نے کوروناوائرس کی وبا سے لڑنے کے لئے ارکین پارلیمان کی تنخواہ 30فیصد کم کرنے کے حکومت کے فیصلے کی حمایت کرتے ہوئے کہاکہ اس وبا کے خلاف جنگ میں بہت پیسے کی ضرورت ہوگی اس لئے سرکاری اشتہارات اور اخراجات میں کمی کرکے بیرون ملک کے دوروں پر روک لگانے کی سخت ضرورت ہے ۔محترمہ گاندھی نے منگل کو وزیراعظم نریندر مودی کو اس سلسلہ میں ایک خط لکھا جس میں حکومت سے لگزری پروجیکٹوں کو روک کر اس فنڈ کا استعمال کورونا سے لڑنے کے لئے کرنے اور وزیراعظم کیئر فنڈ کی رقم کو وزیراعظم قومی ریلیف فنڈ میں منتقل کرنے کی درخواست کی ہے ۔انہوں نے کہاکہ سب سے پہلے حکومت کو ٹیلی ویزن، پرنٹ اور آن لائن اشتہارات پر دو برس کے لئے روک لگاکر یہ پیسہ کورونا وائرس سے پیدا شدہ بحران سے لڑنے میں لگانا چاہئے ۔انہوں نے واضح کیا کہ کووڈ۔19سے متعلق صلاح یا صحت سے متعلق اشتہارات کو اس روک سے باہر رکھا جانا چاہئے ۔ ان کا کہنا تھا کہ مرکزی حکومت اشتہار پر ہر برس تقریباََ 1,250کروڑ روپے خرچ کرتی ہے اوراس پر روک سے کورونا سے معیشت اور سماج کو ہونے والے نقصان کی بھرپائی کرنے میں بڑی مدد مل سکتی ہے ۔کانگریس کی صدر نے کورونا کے پیش نظر 20,000کروڑ روپے کی لاگت سے بن رہے ’سنٹرل وسٹا’ بیوٹی فکیشن ایند کنسٹرکشن پروجیکٹ کو ملتوی کرنے کی بھی مانگ کرتے ہوئے کہا کہ موجودہ حالت میں لگزری پر کیا جانے والاخرچ ضائع کے مترادف ہے ۔
سونیا گاندھی نے کہا کہ مجھے یقین ہے کہ پارلیمنٹ موجودہ عمارت سے ہی اپنا مکمل کام کرسکتی ہے ۔ نیا پارلیمنٹ اور اس کے لئے دفاتر کی تعمیر کی آج ہنگامی حالت میں ضرورت نہیں ہے ۔ایسے بحران کے وقت میں اس خرچ کو ٹالا جاسکتا ہے ۔ اس سے بچائی گئی رقم کا استعمال نئے اسپتالوں اور دیگر سہولیات کی تعمیر پر کیا جاسکتا ہے ۔ انہوں نے کہا کہ حکومت کے خرچ کے بجٹ میں بھی 30فیصد کی کمی کی جانی چاہئے ۔ اس کمی سے ہر برس تقریباََ 2.5لاکھ کروڑ روپے بچیں گے جس کا استعمال مہاجر مزدوروں، مزدوروں، کسانوں، چھوٹے اور غیرمنظم شعبہ میں کام کرنے والے مزدوروں کے مفاد میں کیا جاسکتا ہے ۔کانگریس کی لیڈر نے کہا کہ اس وبا کے پیش نظر صدر، وزیراعظم، مرکزی وزرا، وزرائے اعلی، ریاستوں کے وزرا اور بیوروکریٹس کے ذریعہ تمام غیرملکی دوروں کو ملتوی کیا جانا چاہئے ۔گزشتہ پانچ برس میں صرف وزیراعظم اور مرکزی وزرا کے غیرملکی دوروں پر 393کروڑ روپے خرچ ہوئے جن کا استعمال کورونا وائرس سے لڑائی میں کیا جاسکتا ہے ۔انہوں نے وزیراعظم کیئرس فنڈ کی مکمل رقم کو وزیراعظم قومی ریلیف فنڈ میں منتقل کرنے کی مانگ کی اور کہاکہ عوام کی خدمت کے فنڈ کی تقسیم کے لئے دو الگ الگ فنڈ بنانا محنت اور وسائل کی بربادی ہے ۔