وزیر اعظم اور ان کے ساتھیوں پر تنقید کی وہ قیمت چکا رہے ہیں: عام آدمی پارٹی
نئی دہلی: عام آدمی پارٹی (عآپ) کے راجیہ سبھا رکن سنجے سنگھ کے خلاف ہفتہ کو داخل کی گئی انفورسمنٹ ڈائریکٹوریٹ (ای ڈی) کی ضمنی چارج شیٹ کا جواب دیتے ہوئے، عام آدمی پارٹی (عآپ) نے ان دعووں کو مسترد کر دیا اور اسے ‘جھوٹ کا ایک پیکٹ’ قرار دیا۔عآپ نے زور دے کر کہا کہ متعدد چارج شیٹوں اور متعدد چھاپوں کے باوجود، ای ڈی مبینہ ایکسائز پالیسی گھوٹالے میں سنگھ کے خلاف کوئی ٹھوس ثبوت حاصل کرنے یا کسی مالی بے ضابطگیوں کا پتہ لگانے میں ناکام رہی ہے۔عدلیہ پر اعتماد کا اظہار کرتے ہوئے عآپ نے کہا کہ انصاف کی بالادستی ہوگی۔ سنجے سنگھ بے قصور ہیں اور وہ وزیر اعظم نریندر مودی اور ان کے قریبی ساتھیوں کے سخت ناقد ہونے کی قیمت چکا رہے ہیں۔ عآپ نے الزام لگایا کہ مرکز میں حکمراں بی جے پی غلط کو غلط کہنے والوں کو نشانہ بنانے میں مصروف ہے۔ای ڈی کی چارج شیٹ کے جواب میں کہا گیا ہے کہ ہمیں عدالتی نظام پر پورا بھروسہ ہے اور انصاف ہوگا۔ سنجے سنگھ بے قصور ہیں اور جلد ہی باہر آ جائیں گے۔ وہ صرف وزیر اعظم مودی اور ان کے قریبی دوستوں کے خلاف پارلیمنٹ کے اندر سب سے نڈر آواز ہونے کی شہرت رکھتے ہیں۔عآپ نے کہا کہ عآپ نہ صرف ہندوستان کی سب سے چھوٹی سیاسی جماعت ہے بلکہ یہ وہ پارٹی بھی ہے جس کو بی جے پی حکومت نے سب سے زیادہ نشانہ بنایا ہے۔ عآپ لیڈروں کے خلاف اب تک 250 سے زیادہ فرضی کیس درج کیے گئے ہیں لیکن ایک بھی الزام ثابت نہیں ہوا ہے۔
