بغداد : عراقی وزیر اعظم محمد شیعہ السودانی کا کہنا ہے کہ شامی سرزمین پر حملوں کی اجازت نہیں دی جانی چاہیے ۔سودانی نے امریکی وزیر خارجہ انتھونی بلنکن سے دارالحکومت بغداد میں ملاقات کی۔عراقی وزیر اعظم کے دفتر سے جاری بیان کے مطابق دونوں ممالک کے درمیان دوطرفہ تعلقات اور مشترکہ تعاون کو بہتر بنانے کے ساتھ خطے کی صورتحال، شام کے موجودہ واقعات، علاقائی اور بین الاقوامی کوششوں کی ضرورت کی پیش رفت پر تبادلہ خیال کیا گیا، شام میں سیکیورٹی بڑھانے اور پورے خطے میں استحکام کیلئے بات کی گئی۔ملاقات میں سودانی نے شام کی حمایت پر عراق کے موقف اور شامیوں کو اپنی ریاست کی تعمیر نو میں مدد کرنے والے دوست ممالک کی اہمیت کا اعادہ کیا اور وہاں شہری امن کو متاثر کر سکنے والی مشکلات سے نبرد آزما ہونے میں تعاون کے تقاضے کو بیان کیا۔ملک میں استحکام کو مضبوط بنانے شامی عوام کے تمام طبقوں کو ملکی انتظامیہ میں نمائندگی کی ضرورت پر زور دیتے ہوئے سودانی نے کہا عراق، شام میں منتقلی کے مرحلے کو سنبھالنے کے ذمہ داروں سے باتوں کی نہیں بلکہ عملی کاروائیوں کی توقع رکھتا ہے ۔ان کا کہنا تھا کہ کسی بھی فریق کو شام کی سرزمین پر حملہ کرنے کی اجازت نہیں دی جانی چاہیے اور اسے خطے کی سلامتی و استحکام کیلئے خطرہ تصور کیا جائے ۔امریکی وزیر خارجہ بلنکن نے بھی اس بات پر زور دیا کہ شامی عوام کی ترجیحات کا احترام کرنے اور شامی عوام کے ارادے اور اس کے تمام طبقوں کی نمائندگی کرنے والی ایک جامع حکومت کے قیام کے زیر مقصد ان کا ملک عراق سے متفق ہے ۔ بلنکن نے خطے میں عراق کے اہم شراکت دار کے طور پر اہم کردار اور خطے کی حالت پر عراق سے مشاورت کی اہمیت پر زور دیا ۔
