دوحہ: غزہ میں جنگ بندی کیلئے دوحہ مذاکرات میں پیش رفت سامنے آئی ہے ۔ حماس ذرائع کا کہنا ہے کہ پہلے مرحلے میں جنگ بندی 42 دن کی ہوگی۔میڈیا کے مطابق غزہ میں پہلے مرحلے میں قید اسرائیلی خواتین اور بوڑھوں کو آزاد کیا جائے گا اور بدلے میں اسرائیل جیلوں میں قید فلسطینیوں کو رہا کیا جائے گا۔رپورٹس میں کہا گیا ہے کہ پہلے مرحلے میں اسرائیلی فورسز غزہ کی مشرقی سرحد پر واپس جائیں گی۔ دوسرے مرحلے میں غزہ سے اسرائیلی افواج انخلاء کرے گی اور بدلے میں غزہ میں قید اسرائیلی فوجیوں کو رہا کردیا جائے گا۔اسرائیلی آرمی چیف کا کہنا ہے کہ غزہ میں قید 100 اسرائیلی قیدیوں کی رہائی کیلئے حماس پر دباؤ ڈال رہے ہیں۔دوسری جانب غزہ میں اسرائیل کی جانب سے خون کی ہولی کھیلنے کا سلسلہ جاری ہے ۔ صیہونی فوج کے فضائی حملے میں مزید 10 فلسطینی جام شہادت نوش کرگئے ۔رپورٹ کے مطابق اسرائیلی فوج نے شمالی غزہ کے علاقے جبالیہ میں ایک گھر کو نشانہ بنایا۔
