ناگپور۔16 فروری (سیاست ڈاٹ کام ) ارتھو تائدے(72) اورگنیش ستیش(87) کی شاندار نصف سنچریوں کی مدد سے رانجی چمپئن ودربھ نے ریسٹ آف انڈیا کو پانچویں اور آخری دن پہلی اننگز کی برتری کی بنیاد پر شکست دے کر ایرانی کپ کا اپنا خطاب برقرار رکھا۔ ودربھ نے اس طرح رنجی ٹرافی اور ایرانی کپ ڈبل مسلسل دوسرے سال مکمل کیا۔ ودربھ کو فتح کے لئے 280 رنز کا ہدف ملا تھا اور اس نے میچ ڈرا ختم ہونے تک پانچ وکٹ پر 269 رن بنائے تھے ۔ ودربھ کی جیت تو اسی وقت طے ہو گئی تھی جب اس نے ریسٹ آف انڈیا کے 330 رن کے جواب میں پہلی اننگز میں 425 رنز بنا کر برتری حاصل کر لی تھی۔ریسٹ آف انڈیا نے کل اپنی دوسری اننگز تین وکٹ پر 374 رن پر اعلان کر ودربھ کے سامنے 280 رنز کا ہدف دیا تھا۔ ودربھ نے ایک وکٹ پر 37 رن سے آگے کھیلنا شروع کیا اور میچ ڈرا ختم ہونے تک پانچ وکٹ پر 269 رنز بنائے ۔ ودربھ سیدھی فتح حاصل کرنے کے قریب تھا لیکن گنیش ستیش کے ٹیم کے 269 رن پر آؤٹ ہونے کے بعد دونوں ٹیموں کے کپتانوں نے ڈرا کے لئے ہاتھ ملا لیا۔ودربھ نے گزشتہ سال بھی پہلی اننگز کے برتری کی بنیاد پر ایرانی کپ کا خطاب جیتا تھا۔ ودربھ نے سات وکٹ پر 800 رنز بنانے کے بعد اپنی اننگز کا اعلان کیا تھا اورریسٹ آف انڈیا کو 390 رنز پر آؤٹ کر خطاب جیتا تھا۔ ریسٹ آف انڈیا کی خطاب جیتنے کی امیدیں اسی بات پر منحصر تھیں وہ ودربھ کو آل آؤٹ کرے لیکن تائدے اور ستیش کی نصف سنچری اننگز نے اس کی امیدوں پر پانی پھیر دیا۔ تائدے نے 185 گیندوں میں آٹھ چوکوں اور ایک چھکے کی مدد سے 72 رن بنائے جبکہ ستیش نے 168 گیندوں پر 87 رن میں نو چوکے اور ایک چھکا لگایا۔ ودربھ نے صبح جب کھیلنا شروع کیا تو سنجے رگھوناتھ 17 اور تائدے 16 رن پر ناٹ آؤٹ تھے ۔ رگھوناتھ کا وکٹ 116 کے اسکور پر گرا۔ رگھوناتھ نے 131 گیندوں پر 42 رنز میں چار چوکے اور ایک چھکا لگایا۔ رگھوناتھ اور تائدے نے پہلے وکٹ کے لئے 116 رن کی ساجھے داری کی۔ لیگ اسپنر راہل چاھر نے رگھوناتھ کو ایل بی ڈبلیو کیا۔تائدے 185 گیندوں میں آٹھ چوکوں اور ایک چھکے کی مدد سے 72 رنز بنا کر چاھر کی گیند پر ایل بی ڈبلیو ہوئے ۔ تائدے کا وکٹ 146 کے اسکور پر گرا۔ ستیش نے موہت کالے کے ساتھ چوتھے وکٹ کے لئے 83 رن کی ساجھے داری کر ریسٹ آف انڈیاکو مقابلے سے باہر کر دیا۔ کالے نے 90 گیندوں پر 37 رن میں پانچ چوکے لگائے ۔کالے کا وکٹ 229 کے اسکور پر گرا۔ کالے کو دھرمندرسنگھ جڈیجہ نے آؤٹ کیا۔ ستیش پانچویں بلے باز کی حیثیت سے 269 کے اسکور پر آؤٹ ہوئے ۔ انہیں پارٹ ٹائم آف اسپنر ہنوما وھاري نے اپنے پہلے اوور کی پہلی ہی گیند پر آؤٹ کر دیا۔ اس کے بعد دونوں کپتان نے ڈرا کے لئے اتفاق کیا ہے ۔چاھر نے 116 رن پر دو وکٹ، انکت راجپوت نے 41 رن پر ایک وکٹ، جڈیجہ نے 59 رن پر ایک وکٹ اور ہنوما نے ایک وکٹ حاصل کیا۔ودربھ کی پہلی اننگز میں شاندار 102 رن بنانے والے اور ٹیم کو اہم برتری دلانے والے اکشے کارنیوار کو مین آف دی میچ کا ایوارڈ ملا۔ریسٹ آف انڈیا کے کپتان اجنکیا رہانے نے ودربھ کو دوبارہ چمپئن بننے پر مبارکباد دیتے ہوئے کہاکہ مسلسل دو سال رنجی ٹرافی اور ایرانی کپ جیتنا آسان نہیں ہوتا ہے ، ہر رنجی ٹیم کو ودربھ سے سبق حاصل کرنا چاہئے ۔ ہمارے پاس مواقع تھے لیکن پہلی اننگز میں ہم نے 100 رن جوڑ کر آٹھ وکٹ گنوائے جس سے موقع ہمارے ہاتھ سے نکل گیا۔ فیض فضل نے جیت پر خوشی کا اظہار کرتے ہوئے کہاکہ یہ پوری ٹیم کی جیت ہے ۔
