نئی دہلی: ملک میں پچھلے سال جون کے بعد پہلی بار ایک دن میں کورونا انفیکشن کے دس ہزار سے کم نئے معاملے سامنے آئے ہیں جبکہ اسی مدت میں وبا کو مات دینے والوں کی تعداد 15 ہزار سے زیادہ رہی۔اس دوران ملک میں اب تک 20 لاکھ 23 ہزار 809 لوگوں کو کووڈ 19 کے ٹیکے لگائے جا چکے ہیں۔منگل کی صبح مرکزی وزارت صحت کی جانب سے جاری کردہ اعداد و شمار کے مطابق ، گذشتہ 24 گھنٹوں کے دوران انفیکشن کے 9102 نئے کیس سامنے آئے ہیں ، جس سے متاثرہ افراد کی تعداد ایک کروڑ چھ لاکھ 76 ہزار ہوگئی ہے۔ مسلسل پانچویں دن 15 ہزار سے کم اورسات مہینے بعد 10 ہزار سے کم کورونا انفیکشن کے معاملے رپورٹ ہوئے ہیں۔گذشتہ 24 گھنٹوں میں 15901 مریض صحت مند ہوگئے ، جس کے ساتھ ہی صحت مند افراد کی تعداد ایک کروڑ تین لاکھ 45 ہزار 985 ہوگئی۔
