وزیر دفاع راجناتھ سنگھ کا جودھ پور میں جلسہ سے خطاب
جودھ پور : وزیر دفاع راج ناتھ سنگھ نے عوام کو یقین دلاتے ہوئے کہا کہ کسی بھی حد تک جانا پڑے ہندوستان کی آن، بان، شان، عزت اوراحترام پر کوئی آنچ نہیں آنے دی جائے گی۔ وہ آج جودھ پور ضلع کے سالوا کلاں میں ہمت، بہادری اور عقیدت کی علامت ویر درگا داس راٹھور کے مجسمے کی نقاب کشائی کے موقع پر منعقدہ ایک پروگرام سے خطاب کر رہے تھے ۔ انہوں نے کہا کہ بہت سے لوگ غلط فہمی پیدا کرنے کی کوشش کرتے ہیں اور کہہ رہے ہیں کہ چین نے یہ کردیا، وہ کردیا، سرحدوں کی حفاظت کیسے کی جاتی ہے ۔ انہوں نے کہا کہ ایسی باتیں کرنے والی سیاسی جماعتوں کو جہاں ملک کی عزت واحترام کی بات آتی ہے وہاں سیاست نہیں کرنی چاہیے ۔انہوں نے کہا کہ کوئی بھی سیاستدان سرحد پر جا کر سرحدوں کی حفاظت نہیں کرتا، ان ماؤں کی کوکھ سے جنم لینے والے ان سرحدوں کی حفاظت کر رہے ہیں اور موقع آنے پر وہ اپنی جان قربان کردینے میں بھی پیچھے نہیں ہٹتے اورملک کی سرحد میں کسی کو گھسنے نہیں دیتے ۔انہوں نے ویر درگاداس کی قربانی کو یاد کرتے ہوئے کہا کہ سیاست اقتدار بنانے کے لیے نہیں کی جاتی، سیاست سماج اور ملک کی تعمیر کیلئے کی جاتی ہے ۔
