حیدرآباد11اگست(یواین آئی)اسپیکر تلنگانہ قانون ساز اسمبلی پوچارم سرینواس ریڈی نے عوامی نمائندوں، لڑکوں،لڑکیوں اور محکمہ پولیس کے اہلکاروں کے ساتھ آج آزادی کے 75برس کی تقاریب کے حصہ کے طورپر کاما ریڈی ضلع کے بانسواڑہ میں منعقدہ فریڈم رن میں حصہ لیا۔اس موقع پر اسپیکر سرینواس ریڈی نے کہاکہ بچوں کے درمیان آزادی کا جشن منانے کا یہ ایک بہترین موقع ہے ۔آج کی نسل کے بچے یہ سمجھنا چاہتے ہیں کہ آزادی کا مطلب کیا ہے ۔انگریزوں کے دور حکومت میں ملک اور عوام غلاموں کی طرح زندگی گزارتے تھے ۔انہوں نے کہا کہ نئی نسل کو آزادی کی اہمیت سے واقف کروانا چاہئے ۔ مہاتما گاندھی جیسی اہم شخصیات نے انگریزوں سے آزادی کی لڑائی لڑی اور 200 سال کی غیر ملکی حکمرانی سے ملک کو آزاد کروایا۔آج ہم جو آزادی حاصل کر رہے ہیں وہ ان کی قربانی ہے ۔انہوں نے نشاندہی کرتے ہوئے کہا کہ آزادی کے ثمرات سب کے ساتھ بانٹنے چاہئیں، غربت مٹائی جائے اور تمام خوشی سے زندگی بسر کریں۔انہوں نے کہا کہ اس موقع پرآئیے ہم سب ملک کے عوام، ریاست، کسانوں، خواتین اور غریبوں کے مفاد کے لیے متحد ہوجائیں۔آزادی کے 75 سال مکمل ہونے کے موقع پر ریاستی حکومت نے اس ماہ کی 8 تاریخ سے 22 تاریخ تک روزانہ کی سرگرمیوں کے ساتھ ان تقاریب کا شیڈول جاری کیا ہے ۔انہوں نے تمام سے خواہش کی کہ وہ متعلقہ پروگراموں میں جوش و خروش سے شرکت کریں۔
