سچائی سامنے آ گئی تو نقصان اڈانی کا نہیں کسی اور کا ہوگا ‘ چھتیس گڑھ میں خطاب
رائے پور :کانگریس کے سابق صدر راہول گاندھی نے ہفتہ کے روز اڈانی گروپ کے اسٹاک ہیر پھیر سے متعلق الزامات کو لے کر وزیر اعظم نریندر مودی کو ایک بار پھر تنقید کا نشانہ بنایا۔ چھتیس گڑھ کی قیادت والی کانگریس حکومت کے ذریعہ منعقد ایک تقریب میں ایک لاکھ سے زیادہ نوجوانوں کے ہجوم سے خطاب کرتے ہوئے راہول گاندھی نے کہا کہ وزیر اعظم مودی اڈانی پر جانچ کا حکم نہیں دے سکتے، کیونکہ اگر ایسا ہوا اور سچائی سامنے آ گئی تو نقصان اڈانی کا نہیں بلکہ کسی اور کا ہوگا۔راہول گاندھی نے کہا کہ وزیر اعظم مودی کی قیادت والی مرکزی حکومت نے ملک کی معیشت کی ریڑھ کی ہڈی توڑ دی ہے۔ وہ چنندہ بزنس مین کے گروپ کیلئے کام کر رہے ہیں۔ جی ایس ٹی اور نوٹ بندی نے چھوٹے کاروباریوں کو برباد کر دیا ہے -کانگریس کے سابق صدر نے کہا کہ کانگریس ہمیشہ غریبوں کے لیے کام کرتی ہے اور آگے بھی کرتی رہے گی۔ انھوں نے کہا کہ چاہے وہ چھتیس گڑھ، راجستھان، کرناٹک، ہماچل پردیش کی حکومتیں ہوں یا تلنگانہ اور مدھیہ پردیش کی آنے والی حکومتیں ہوں، وہ اڈانی کی حکومت ہونے کی جگہ غریبوں کی حکومت ہوں گی۔قابل ذکر ہے کہ کانگریس کارکنان کو خطاب کرنے سے پہلے راہول گاندھی آج نوا رائے پور میں چھتیس گڑھ حکومت کے زیر اہتمام منعقدہ ’راجیو یوا متان سمیلن‘ میں شامل ہوئے۔ بہرحال، چھتیس گڑھ میں اسمبلی انتخاب اس سال کے آخر میں پڑوسی ریاستوں مدھیہ پردیش، راجستھان اور تلنگانہ کے ساتھ ہونے والے ہیں۔