رائے پور: چھتیس گڑھ کی گورنر انوسویا اوئیکے نے کہا کہ کورونا دور کے چیلنجوں کے درمیان ریاستی حکومت کی پرکشش پالیسیوں اور اسکیموں کی وجہ سے کسانوں کی ایک بڑی تعداد دوبارہ کھیتی کی طرف راغب ہوئی ہے ، جس کی وجہ سے روزگار کے نئے مواقع پیدا ہوئے ہیں۔محترمہ اوئیکے نے آج راجدھانی کے پولس پریڈ گراؤنڈ میں 73ویں یوم جمہوریہ کے موقع پر منعقدہ مرکزی تقریب میں پرچم کشائی کے بعد کہا کہ روزگار کے نئے مواقع بڑھانے کے لیے حکومت نے صنعت اور کاروبار کے شعبے میں بہت سی رعایتیں دی ہیں۔ عام آدمی کو طرح طرح کے مالی مدد دے کر ان کی قوت خرید میں اضافہ کیا گیا۔ اس طرح ریاست میں معیشت کو سنبھالا دیا گیا، جس کی وجہ سے ہر سطح پر حوصلے مضبوط ہوئے ۔انہوں نے کہا کہ ان کوششوں کی وجہ سے چھتیس گڑھ میں بے روزگاری کی شرح تین سالوں میں دوسری بار 2 فیصد کے قریب پہنچ گئی ہے ۔ اس سے پہلے چھتیس گڑھ میں بے روزگاری کی شرح 22 فیصد سے زیادہ تھی جس میں 20 فیصد کی کمی بہت خوش آئند ہے ۔انہوں نے کہا کہ چھتیس گڑھ حکومت نے دھان پیدا کرنے والے کسانوں کو مدد فراہم کرکے اپنی سب سے بڑی ذمہ داری ادا کی ہے ۔ گزشتہ سال 92 لاکھ میٹرک ٹن دھان کا ریکارڈ بنایا گیا تھا۔ محترمہ اوئیکے نے کہا کہ کسانوں کی آمدنی بڑھانے کے لیے میری حکومت نے طویل مدتی ادارہ جاتی اقدامات پر بھی زور دیا ہے تاکہ اس سمت میں کوششیں جاری رہیں۔ چائے اور کافی کی کاشت اور پروسیسنگ کو فروغ دینے کے لیے ‘چھتیس گڑھ ٹی کافی بورڈ تشکیل دیا گیا ہے ۔ زرعی مصنوعات کی برآمدات کو فروغ دینے کے لیے اعلیٰ سطح کی فائٹو سینیٹری لیبز قائم کی گئی ہیں۔
