نئی دہلی۔ 17 مئی (یو این آئی) کانگریس نے دہشت گردی پر ہندوستان کا موقف دنیا کے سامنے پیش کرنے کے لیے بیرون ملک بھیجے جانے والے کل جماعتی وفد میں شامل ہونے کے لیے اپنے چار اراکین پارلیمنٹ کے نام حکومت کو بھیجے ہیں۔ کانگریس کی میڈیا سیل کے سربراہ جے رام رمیش نے یہ اطلاع دیتے ہوئے کہا کہ پارٹی نے اس وفد میں شامل ہونے کے لیے لوک سبھا اور راجیہ سبھا سے دو دو اراکین کے نام بھیجے ہیں۔ انہوں نے کہا کہ پارٹی کی جانب سے وفد کے لیے بھیجے گئے اراکین اسمبلی کے ناموں میں سابق مرکزی وزیر آنند شرما، لوک سبھا میں کانگریس کے ڈپٹی لیڈر گورو گوگوئی، راجیہ سبھا کے رکن ڈاکٹر سید نصیر حسین اور راجہ برار شامل ہیں۔ انہوں نے کہا کہ کل صبح پارلیمانی امور کے وزیر کرن رجیجو نے کانگریس صدر ملک ارجن کھڑگے اور لوک سبھا میں قائد حزب اختلاف راہل گاندھی سے بات کی اور کانگریس پر زور دیا کہ وہ پاکستان سے دہشت گردی پر ہندوستان کے موقف کو واضح کرنے کے واسطے بیرون ملک بھیجے جانے والے وفود کے لئے پارٹی کے چار ارکان پارلیمنٹ کے نام دیں۔ پارٹی نے کل دوپہر تک کانگریس کی جانب سے حکومت کو نام بھیجے تھے ۔ واضح رہے کہ پہلگام دہشت گردانہ حملے کے بعد دہشت گردی کے خلاف ہندوستان کے موقف کو واضح کرنے کے لیے کل جماعتی وفود کو مختلف ممالک کے دارالحکومتوں میں بھیجنے کا فیصلہ کیا گیا ہے ۔
