نئی دہلی: کورونا ویکسین کی ٹیکہ اندازی مہم سے وابستہ مسائل کی نشاندہی کرکے انہیں دور کرنے کی کوشش کے تحت آج ہفتہ کو ملک بھر کے 116 اضلاع کے 259 مقامات پر ’ڈرائی رن ‘ یا ریہرسل کا انعقاد عمل میں لایا گیا ۔ ملک کی چار ریاستوں میں کورونا ویکسین کے ’ڈرائی رن‘ کی کامیابی کے بعد مرکزی حکومت نے آج ملک کی تمام ریاستوں اور مرکزکے زیر انتظام علاقوں میں ’ڈرائی رن‘ کا اعلان کیا تھا۔ جس پر آج عمل درآمد کیا گیا ۔ مرکزی وزارت صحت اور خاندانی بہبود نے آج کہا کہ مرکزی حکومت کی ہدایت کے مطابق ملک کی تمام ریاستوں اور مرکزی علاقوں میں کورونا ویکسین لگانے کا ریہرسل کیا گیا ۔یہ بات قابل غور ہے کہ ’ڈرائی رن‘ کے دوران ویکسی نیشن مہم سے متعلق پورے طریق کار پر عمل کیا جاتا ہے گویا واقعی ویکسی نیشن مہم چلائی جارہی ہے ۔ قابل غور ہے کہ ’ڈرائی رن‘ کے دوران ویکسی نیشن مہم سے متعلق تمام کارروائیوں پر عملدرآمد کیا جاتاہے ۔ اس سے کورونا ویکسین کے حوالہ سے تیار ’کو- ون ایپ‘ بیرونی ماحول میں کس طرح سے کام کرتا ہے ، اس کے بارے میں یہ بھی معلوم ہوجائے گا اور اس سے نمٹنے کے طریقے بھی بنائے جاسکیں گے ۔ اس سے مختلف سطحوں پر ویکسی نیشن مہم میں شامل ہونے والے لوگوں کا حوصلہ بھی بڑھے گا۔ملک میں ’ڈرائی رن‘ کا پہلا مرحلہ آندھرا پردیش ، آسام ، گجرات اور پنجاب میں 28 اور 29 دسمبر کو منعقد کیا گیا تھا۔
