ہمت ہے تو کل ہی الیکشن کرائیں ہم تیار ہیں

وزیر اعظم مودی کو ممتا بنرجی کا چیلنج‘ آپریشن بنگال کے بیان پر برہمی

کولکاتہ۔29؍مئی ( ایجنسیز )مغربی بنگال کی وزیر اعلیٰ ممتا بنرجی نے بی جے پی پر شدید تنقید کی ہے۔ انہوں نے حکومت کو للکارتے ہوئے کہا کہ اگر آپ میں ہمت ہے تو کل ہی الیکشن کرائیں، ہم تیار ہیں اور بنگال بھی آپ کا چیلنج قبول کرنے کو تیار ہے۔مغربی بنگال کی وزیر اعلیٰ ممتا بنرجی نے کہا کہ مودی جی نے آج جو کچھ کہا اس کو سن کر ہمیں نہ صرف حیرت ہوئی بلکہ بہت دکھ بھی ہوا جب اپوزیشن ملک کی نمائندگی کر رہی ہے اور ملک کے مفادات کو آگے بڑھا رہی ہے۔ ایسے وقت میں ان کے رہنما ان کی موجودگی میں کہہ رہے ہیں کہ وہ آپریشن سندور کی طرح آپریشن بنگال چلائیں گے۔ترنمول کانگریس کی سربراہ نے کہاکہ میں انہیں چیلنج کرتی ہوں۔ اگر ان میں ہمت ہے تو کل الیکشن کرادیں، ہم تیار ہیں اور بنگال آپ کے چیلنج کو قبول کرنے کے لیے تیار ہے لیکن یاد رکھیں کہ یہ کیا وقت ہے۔ ہمارے نمائندے بشمول ابھیشیک بنرجی ہر روز دہشت گردی کے خلاف آواز اٹھا رہے ہیں۔ ایسے وقت میں وزیر اعظم مودی آپ اس حکومت کی مذمت کر رہے ہیں جس نے آپ کو پورا تعاون دیا ہے۔ممتا بنرجی نے کہا کہ آپ حکومت پر الزام لگا رہے ہیں اور اس وقت آپ اپوزیشن پر الزام لگانا چاہتے ہیں تاکہ سیاست ہو جس طرح بی جے پی جملا پارٹی کے لیڈر کر رہے ہیں۔ آپ جھوٹ کا پوٹلا بول رہے ہیں۔ آپریشن سندور کی اس انداز میں بات کرنا اچھا نہیں لگتا۔ اگرچہ میرا کوئی تبصرہ نہیں ہے لیکن یاد رکھیں کہ سندور ہر عورت کی عزت ہے۔آپ کو بتاتے چلیں کہ ممتا بنرجی کا یہ تبصرہ ایسے وقت میں آیا ہے جب وزیر اعظم مودی مغربی بنگال کے علی پور دوار پہنچے۔ وزیر اعظم نے ٹی ایم سی پر سخت نشانہ لگایا اور کہا کہ بنگال کے لوگ ظالم حکومت نہیں چاہتے انہیں ٹی ایم سی حکومت پر بھروسہ نہیں ہے۔
اس موقع پر انہوں نے سٹی گیس ڈسٹری بیوشن پراجکٹ کا بھی آغاز کیا۔