آر ایس ایس سربراہ موہن بھگوت کے متنازعہ بیان پر سخت ردعمل
نئی دہلی :سماج وادی پارٹی قائد سوامی پرساد موریہ نے آر ایس ایس سربراہ موہن بھگوت کے ہندو راشٹر سے متعلق متنازعہ بیان پر اپنے سخت ردعمل کا اظہار کیا۔ موریہ نے کہا کہ ہندوستان، ہندو ملک نہیں ہے اور نہ ہی ماضی میں کبھی ہندو ملک تھا۔سوامی پرساد نے آج ایکس پر اپنا ردعمل ظاہرکرتے ہوئے کہا کہ ہندوستان فی الحال کوئی ہندو ملک نہیں ہے بلکہ ماضی میں کبھی بھی ہندوستان، ہندو ملک نہیں تھا۔ انہوں نے کہا کہ ہم ایک خودمختار قوم ہیں اور ہمارا آئین سیکولر تصور پر مبنی ہے۔ ہندوستان کے تمام لوگ ہندوستانی ہیں۔ ہمارا ہندوستانی آئین تمام مذاہب، فرقوں، ذاتوں اور ثقافتوں کی نمائندگی کرتا ہے۔ واضح رہے کہ کل موہن بھگوت نے ایک تقریب میں خطاب کیا اور ہندوستان کو ہندو راشٹر قرار دیتے ہوئے کہا کہ تمام ہندوستانی ہندو ہیں۔ انہوں نے کہا تھا کہ نظریاتی طور پر تمام ہندوستانی ہندو ہیں کچھ لوگ سمجھ گئے ہیں اور کچھ لوگ سمجھنے کے بعد بھی جاہل ہیں۔
