برسبین: تیسرے ٹسٹ کے تیسرے دن پیر کی صبح آسٹریلیا کو 445تک محدود رکھنے کے بعد ہندوستان یشسوی جیسوال، شبھمن گل، ویراٹ کوہلی اور رشبھ پنت کے وکٹ گنوانے کے بعد مشکل میں ہے ۔ دن کا کھیل ختم ہونے پر ہندستان کا اسکور 51/4 ہے اور وہ آسٹریلیا کے اسکور سے اب بھی 394 رن پیچھے ہے۔ کے ایل راہول (33 ناٹ آؤٹ) اور کپتان روہت شرما (0ناٹ آؤٹ) کریز پر موجود ہیں۔ ہندوستانی ٹیم کو اب میچ کے پُرامید نتیجے کیلئے کپتان روہت اور راہول کی دلیرانہ اننگز کا انتظار رہے گا۔ آج صبح آسٹریلیا نے گزشتہ روز کے اسکور 405/7 سے آگے کھیلنا شروع کیا۔ جسپریت بمراہ نے مچل اسٹارک (18) کو آؤٹ کرکے ہندوستان کو آٹھویں کامیابی دلائی۔ اس کے بعد محمد سراج نے نیتھن لیون (2) کو بولڈ کرکے پویلین بھیج دیا۔ آکاش دیپ نے ایلکس کیری (70) کو آؤٹ کر کے آسٹریلیا کی پہلی اننگز 445 پر سمیٹ دی۔ ہندستان کی جانب سے جسپریت نے چھ اور سراج نے دو وکٹیں حاصل کیں۔ نتیش کمار ریڈی اور آکاش دیپ نے ایک ایک بلے باز کو آؤٹ کیا۔ اس کے بعد بیٹنگ کیلئے آنے والی ہندوستانی ٹیم کی شروعات اچھی نہیں رہی اور اسٹارک نے پہلے ہی اوور میں جیسوال (4) کو آؤٹ کرکے ہندوستان کو پہلا جھٹکا دیا۔ تیسرے اوور میں اسٹارک نے شبھمن (1) کو بھی اپنا شکار بنایا۔ جوش ہیزل ووڈ نے آٹھویں اوور میں کوہلی (3) کو آؤٹ کیا۔ اس وقت ٹیم کا اسکور صرف 22 رن تھا۔ اس کے بعد راہول اور رشبھ نے اننگز کو سنبھالنے کی کوشش کی۔ جب 13اووروں کے بعد بارش کی وجہ سے کھیل روک دیا گیا تو ہندوستان نے تین وکٹوں پر 39 رن بنائے تھے ۔ اس کے بعد جب کھیل شروع ہوا تو ہندوستان نے 14ویں اوور میں رشبھ (9) کا وکٹ گنوا دیا۔ پنت کو کیپٹن پیاٹ کمنز نے وکٹ کیپر کیری کے ہاتھوں کیچ آؤٹ کیا۔ آسٹریلیا کی جانب سے اسٹارک نے دو وکٹیں حاصل کیں۔ ہیزل ووڈ اور منز نے ایک ایک بلے باز کو آؤٹ کیا۔
