رانچی: بی جے پی جھارکھنڈ کے ریاستی صدر اور سابق وزیر اعلی بابولال مرانڈی نے آج ریاستی حکومت پر بڑا حملہ کرتے ہوئے کہا کہ ہیمنت سورین خاندان نے گناہ کیا ہے ، اسے جیل تو جانا ہی پڑے گا۔ مرانڈی آج سنکلپ یاترا کے دوران جھارکھنڈ کی ذیلی راجدھانی دمکا میں اسمبلی حلقہ کے لوگوں سے خطاب کر رہے تھے ۔ بارش کے باوجود جلسہ میں ہزاروں لوگ موجود تھے ۔ جے ایم ایم اور ہیمنت حکومت پر حملہ کرتے ہوئے مرانڈی نے کہا کہ جے ایم ایم کو سنتھل پرگنہ بلڈرز پرائیویٹ لمیٹڈ کمپنی کے نام پر اوچھی سیاست کرنا بند کر دینی چاہیے ۔
انہوں نے کہا کہ جے ایم ایم کو پریس کانفرنس کرنے کی کیا ضرورت ہے ، اپوزیشن کے لوگ پریس کانفرنس کرتے ہیں۔ یہ ان کی حکومت ہے ، پولیس انتظامیہ ہے ، وہ براہ راست ایکشن لیں، ایف آئی آر درج کریں اور جس شخص نے خلاف قانون کام کیا ہے اور جرم کیا ہے اس کی جائیداد ضبط کریں۔ مرانڈی نے کہا کہ ہیمنت حکومت بدعنوانی میں دھنسی ہوئی ہے ۔ اور جب بھی بی جے پی کی حکومت بنتی ہے وہاں ترقی کی بات ہوتی ہے اور جب جے ایم ایم، کانگریس، آر جے ڈی کی حکومت بنتی ہے تو بدعنوانی کی بات ہوتی ہے ۔
