سی ای سی راجیو کمار نے سماج وادی پارٹی کی شکایات کا سنجیدگی سے نوٹس لیتے ہوئے یوپی کے انتخابی عہدیداروں کو ایک منصفانہ اور غیر جانبدارانہ ووٹنگ کے عمل کو یقینی بنانے کی ہدایت دی۔
الیکشن کمیشن آف انڈیا (ای سی) نے چہارشنبہ کو اتر پردیش کے ضمنی انتخابات میں ووٹروں کی جانچ پڑتال اور انہیں ووٹ ڈالنے سے روکنے کے لئے اس کے رہنما خطوط کی خلاف ورزی کرنے پر دو پولیس اہلکاروں کو معطل کرنے کا حکم دیا۔
یہ کارروائی سماج وادی پارٹی (ایس پی) کے صدر اکھلیش یادو کے اس معاملے کو اٹھانے کے بعد ہوئی، جس میں پول پینل سے ویڈیو ثبوت پر کارروائی کرنے کی اپیل کی گئی جس میں پولس اہلکاروں کو ووٹروں میں رکاوٹ ڈالتے ہوئے دکھایا گیا تھا۔ ہدایت کے بعد، ضلعی الیکشن افسران اور پولیس سپرنٹنڈنٹس نے شکایات کی تصدیق کی اور بدتمیزی کرنے پر ملزم اہلکاروں کو معطل کر دیا۔
اس وقت غازی آباد، کٹہاری، کھیر، کنڈرکی، کرہل، ماجھوان، میرا پور، پھول پور اور سیسماؤ کی نو اسمبلی سیٹوں پر ضمنی انتخابات جاری ہیں۔
سماج وادی پارٹی کی سوشل میڈیا رپورٹس کا سنجیدگی سے نوٹس لیتے ہوئے جس میں الزام لگایا گیا تھا کہ کچھ کمیونٹیز کو ووٹنگ سے روکا جا رہا ہے، چیف الیکشن کمشنر راجیو کمار نے اتر پردیش کے انتخابی عہدیداروں کو ہدایت دی کہ وہ ایک منصفانہ اور غیر جانبدارانہ ووٹنگ کے عمل کو یقینی بنائیں۔
ان سے کہا گیا کہ وہ تمام شکایات کا فوری نوٹس لیں، اور فوری کارروائی کریں اور شکایت کنندہ کو سوشل میڈیا کے ذریعے بھی ٹیگ کرکے مطلع کریں۔
انہیں متنبہ کیا گیا کہ کسی بھی اہل ووٹر کو ووٹ ڈالنے سے نہ روکا جائے اور کسی بھی قسم کا جانبدارانہ رویہ برداشت نہیں کیا جائے گا۔
عہدیداروں نے پولنگ مشینری سے کہا کہ شکایت ملنے کے بعد اگر کوئی قصوروار پایا جاتا ہے تو سخت کارروائی کی جانی چاہئے۔