شہرماریوپول کی تھیٹر بھی نشانہ ،وہاںموجود 1200افراد کا حشر نامعلوم
کیف:روس کی جانب سے یوکرین کے مختلف شہروں اور رہائشی علاقوں پر بمباری کا سلسلہ جاری ہے ۔ تازہ اطلاعات کے مطابق خارکیف شہر کے باہر ایک ٹاؤن میں ایک اسکول اور کلچرل سنٹر پر روس کی شدید بمباری کے نتیجہ میں 21 افراد ہلاک ہوگئے جبکہ دیگر 25 کے زخمی ہونے کی اطلاع ہے ۔ یوکرین نے دعویٰ کیا ہے کہ روس نے جنوبی ساحلی شہر ماریوپول کے ایک تھیٹر پر بمباری کی ہے جس میں اس وقت 1200سے زائد افراد پناہ لیے ہوئے تھے۔میڈیاکے مطابق یوکرین کے حکام نے حملے میں ہلاک یا زخمی ہونے والوں کے حوالے سے کوئی بیان جاری نہیں کیا البتہ بمباری سے متاثرہ تھیٹر کی تصاویر جاری کی ہیں جس میں تین منزلہ عمارت کو تباہ اور اس سے دھویں کے بادل نکلتے ہوئے دیکھے جا سکتے ہیں۔ماریوپول سٹی کونسل نے ٹیلی گرام پوسٹ میں کہا کہ حملہ آوروں نے ڈرامہ تھیٹر کو تباہ کر دیا ہے، یہ ایک ایسی جگہ ہے جہاں ایک ہزار سے زائد لوگوں نے پناہ لی ہوئی تھی، ہم انہیں کبھی معاف نہیں کریں گے۔ماریوپول کے میئر ویدم بیچنکو نے ویڈیو پیغام میں حملے کو خوفناک سانحہ قرار دیتے ہوئے کہا کہ لوگ وہاں چھپے ہوئے تھے اور کچھ نے کہا کہ وہ خوش قسمت تھے کہ زندہ بچ گئے لیکن بدقسمتی سے سب خوش قسمت نہیں تھے۔کئی دنوں سے روسی افواج نے 5لاکھ آبادی کے شہر پر بمباری کا سلسلہ جاری رکھا ہوا ہے اور بجلی، خوراک اور پانی کی سپلائی بند کر دی گئی ہے۔یوکرینی حکام نے روس اور ان کے صدر ولادمیر پیوٹن کو بمباری کو جنگی جرم قرار دیا ہے۔ایک سرکاری بیان میں کہا گیا ہے کہ اس گھٹیا پن اور ظلم کی سطح کو بیان کرنے کے لیے الفاظ تلاش کرنا ناممکن ہے اور روسی حملہ آور یوکرین کے شہر کے پرامن باشندوں کو سمندر برد کرنا چاہتے ہیں۔دوسری جانب روس کی وزارت دفاع نے افواج کی جانب سے تھیٹر کی عمارت پر بمباری کی تردید کی اور کہا کہ عمارت یوکرین کی قوم پرست ازوف بٹالین کی طرف سے کیے گئے ایک دھماکے میں تباہ ہوئی تھی۔انہوں نے دعویٰ کیا کہ اس مقام پر پرامن شہریوں کو یرغمال بنایا جا سکتا ہے۔انسانی حقوق کے گروپوں نے کہا کہ ماریوپول کے حوالے سے صورتحال ابھی تک واضح نہیں ہے۔ہیومن رائٹس واچ کے بیلکیس ولی نے کہا کہ ہم اس بارے میں زیادہ نہیں جانتے لیکن ہمیں معلوم ہے کہ تھیٹر میں کم از کم 500 شہری رہائش پذیر تھے۔یوکرین کے حکام کے مطابق ماریوپول میں اب تک 2ہزار سے زائد افراد ہلاک ہو چکے ہیں۔روسی افواج نے بدھ کے روز یوکرین کے جنوبی شہر زپرزیا میں ایک ریلوے اسٹیشن کو ایک ایسے موقع پر نشانہ بنایا تھا جب ماریوپول سے ہزاروں مہاجرین منتقلی کی کوشش کر رہے تھے۔