نئی دہلی :وزیر خزانہ نرملا سیتارمن نے بجٹ میں کسی ریاست کے ساتھ سیاسی بنیادوں پر بھید بھاؤ کے الزامات کو مسترد کرتے ہوئے کہا کہ بہت سی ریاستیں صحت، تعلیم، شہری ترقی، اور دیہی روزگار جیسے منصوبوں کے لیے مرکزی حکومت سے ملے پیسوں کو مکمل طور پر خرچ نہیں کر پا رہی ہیں، اور پھر بھی وہ فنڈز میں بھید بھاؤ کی شکایت کرتی ہیں۔ سیتارمن نے بجٹ 2025-26 پر لوک سبھا میں تین دن کی بحث کا جواب دیتے ہوئے کہا کہ بجٹ پر اراکین نے وسیع بحث کی اور 71 اراکین نے بجٹ سے متعلق مختلف نکات اٹھائے ۔ یہ بجٹ ایسے وقت میں آیا ہے جب پوری دنیا کا اقتصادی ماحول بدل رہا ہے ، اس لیے ،اس میں ترقی پذیر معیشت کو آگے بڑھانے کے لیے مضبوط اقدامات کیے گئے ہیں۔ ہندوستان کی معیشت حقیقت میں 5.6 فیصد ہے اور موجودہ قیمتوں کے لحاظ سے 9 فیصد سے زیادہ ہے ۔ بجٹ میں کئی نئی اہم اسکیمیں اور تجاویز شامل ہیں، اور خاص طور پر کسانوں کے لیے خصوصی اقدامات کیے گئے ہیں تاکہ ان کا حوصلہ بڑھ سکے ۔ مالی خسارہ جی ڈی پی کا 4.4 فیصد ہے ۔انہوں نے کہا کہ حکومت مسلسل بجٹ میں اصلاحات کے اقدامات کر رہی ہے ۔ پچھلے بجٹوں میں معیشت میں بہتری کے لیے ایک ونڈو سسٹم بنایا گیا تھا اور شفافیت کو فروغ دیا گیا تھا۔ ریاستوں کے ساتھ چیک اینڈ بیلنس پر توجہ دی گئی ہے اور ریاستی سطح پر حالات میں بہتری کے لیے اقدامات کیے گئے ہیں۔ پچھلے پانچ سال کے دوران بجٹ کی تیاری، شفافیت، اور بجٹ کو زیادہ قابل اعتبار بنانے کے لیے تمام کوششیں کی گئی ہیں۔
