مجھے ووٹ دو، ورنہ تمہارے لیے کوئی کام نہیں کروں گا
بنگلورو:کرناٹک کے بی جے پی رکن اسمبلی پریتم گوڑا مسلم ووٹروں کو دھمکیاں دیتے ہوئے نظر آ رہے ہیں۔ دراصل، بی جے پی ایم ایل اے گوڑا کا ایک ویڈیو سوشل میڈیا پر تیزی سے وائرل ہو رہا ہے۔ پریتم گوڑا کو مسلم ووٹروں سے یہ کہتے ہوئے سنا جا سکتا ہے کہ جب تک وہ انہیں ووٹ نہیں دیں گے وہ ان کا ذاتی کام نہیں کریں گے۔ویڈیو میں مبینہ طور پر بی جے پی لیڈر پریتم گوڑا کو یہ کہتے ہوئے نظر آ رہے ہیں کہ اگر میں نے کام کیا ہے اور اگر آپ مدد نہیں کرتے ہیں، تو مجھے لگتا ہے کہ آپ کی مدد کرنے کا کوئی فائدہ نہیں ہے۔’’ مجھے ووٹ دیں، ورنہ میں آپ کے لیے کام نہیں کروں گا۔‘‘ حالانکہ میڈیا نے اس ویڈیو کی تصدیق نہیں کی ہے۔بی جے پی ایم ایل اے پریتم گوڑا نے مزید کہا کہ ‘آپ نے تین انتخابات میں ووٹ نہ دے کر مجھے دھوکہ دیا ہے۔ چھ ماہ میں دوبارہ انتخابات ہوں گے۔ اگر تم نے مجھے دوبارہ دھوکہ دیا تو میں وہیں رہوں گا اور تمہارا کوئی کام نہیں کروں گا۔ اگر تم میرے گھر آؤ گے تو میں کافی پیش کروں گا اور تمہیں واپس بھیج دوں گا اور کوئی بھی کام نہیں کروں گا۔
