ریاض ۔ سعودی ایرلائنز کی جانب سے ملک واپس آنے والوں کیلئے ضوابط کا اعلان کیا ہے جس کے ساتھ ایس او پیز جاری کیے گئے ہیں۔ ایس او پیز کے تحت سعودی عرب واپس آنے والے مسافروں کو سات دن تک گھریلو قرنطینہ میں رہنا ہوگا۔ تاہم حکام کی جانب سے تاحال غیر ملکیوں کے لیے سعودی عرب واپسی کی کوئی حتمی تاریخ مقرر نہیں کی گئی۔ ویب نیوز نے سعودی ایرلائنز کے حوالے سے کہا ہے کہ مملکت آنے والے مسافروں کو وزارت صحت کی جانب سے جاری کیے گئے قواعد پر عمل کرنا ہو گا۔وزارت صحت کی جانب سے اس حوالے سے جاری حلف نامے میں مسافر کا نام ، رہائش کا پتہ ، اقامہ نمبر، جس ملک سے آرہے ہیں، فلائٹ نمبر اور تاریخ آمد واضح طور پر درج کرنی ہوگی۔ حلف نامے میں مسافر کو اس امر کا پابند کیا گیا ہے ہے کہ وہ مملکت کے ایرپورٹ پر آتے ہی مذکورہ فارم پر کرکے وزارت صحت کے متعلقہ کاونٹر پر جمع کروائے۔ہر مسافر پرلازم ہو گا کہ وہ خود کو سات دن تک گھریلو قرنطینہ کرے جبکہ امور صحت کے شعبے سے تعلق رکھنے والے مسافروں کیلیے یہ پابندی تین دن کی ہوگی۔قرنطینہ کی مدت مکمل ہونے کے بعد کورونا ٹسٹ کی رپورٹ بھی پیش کرنا ہوگی۔مسافر سعودی آمد کے 8 گھنٹے کے اندر ’تطمن‘ ایپ پر اپنی رہائش کا پتہ فراہم کریں گے۔ تاہم حکام کی جانب سے تاحال غیر ملکیوں کے لیے سعودی عرب واپسی کی کوئی حتمی تاریخ مقرر نہیں کی گئی۔واضح رہے السعودیہ ایر کی جانب سے جن25 ممالک کی فہرست جاری کی گئی ہے ان میں متحدہ عرب امارات ، کویت ، عمان ،بحرین، مصر ، لبنان ، تیونس،چین، برطانیہ ، فرانس ، اٹلی ، جرمنی ، انڈونیشا ، بنگلہ دیش ، یونان، جرمنی ، ملایشیا، سوڈان ، ترکی ، نائجیریا، کینیا ، جنوبی افریقہ شامل ہیں جبکہ پاکستان اور ہندوستان اس فہرست میں شامل نہیں۔
